Vísir - Skólanámskrá

 

 Efnisyfirlit

Inngangur

Pistill ritstjóra

Skólastefna Öxarfjarðarskóla

Agi og umgengni

Skólareglur Viðurlög við brotum á skólareglum Öxarfjarðarskóla Forföll og leyfi

Hagnýtar upplýsingar

Símanúmer Öxarfjarðarskóla, Lundi   Starfsfólk Öxarfjarðarskóla Skólastjórnendur Kennarar Aðrir starfsmenn skólans  Skólabílstjórar Tímasetningar skólabíla Reglur í skólabílum Ýmis símanúmer Kennararáð Öxarfjarðarskóla Skólanefnd Norðurþings Foreldraráð Öxarfjarðarskóla Stjórn foreldrafélags Öxarfjarðarskóla Nemendaverndarráð Öxarfjarðarskóla Áfallaráð Öxarfjarðarskóla

Skóladagatal

Skýringar með skóladagatali

Samstarfsaðilar

Heilsugæsla Fjölskylduþjónusta þingeyinga

Skipulag náms og kennslu

Samkennsla Stuðnings- og sérkennsla Reglubundin próf og skimanir Námsmat

Skipulag námshópa

1. - 3. bekkur í Lundi 1. - 4. bekkur á Kópaskeri 4. - 7. bekkur í Lundi 5. - 7. bekkur á Kópaskeri 8. - 10. bekkur í Lundi

Námsgreinar

Yngsta stig, 1. - 4. bekkur Mið stig, 5. - 7. bekkur Unglingastig, 8. - 10. bekkur

 

 Inngangur 

Ágætu nemendur, foreldrar/forráðamenn og aðrir lesendur.

 

Vísir er skólanámskrá Öxarfjarðarskóla og út koma bæði Litli Vísir og Stóri- Vísir. Í Litla-Vísi er fyrst og fremst almennur hluti skólanámskrárinnar og stutt lýsing á kennslufyrirkomulagi og almennum markmiðum námshópa. Í Stóra-Vísi verða hverri námsgrein hins vegar gerð ítarlegri skil. Skólanámskrá þarfnast sífelldrar endurskoðunar og hún tekur því einhverjum breytingum frá ári til árs.

 

Litli- Vísir kom upphaflega út í ritstjórn Péturs Þorsteinssonar og og er að okkar mati samofið námskránni og fylgir ritstjórapistill hans námskránni áfram með hans leyfi.

 

Aðalmarkmið skólanámskrár er að gefa ljósa mynd af þeim starfsháttum, áherslum og stefnum sem endurspeglast í skólastarfinu. Auk þess er þar töluvert af hagnýtum upplýsingum sem þægilegt er að hafa aðgengilegar á einum stað. Slíkar upplýsingar geta þó aldrei verið tæmandi og við munum halda áfram að senda fréttakorn um starf skólans á vef Öxarfjarðarskóla. Við viljum byggja upp gott samstarf og upplýsingastreymi milli heimila og skóla. Lykilatriði í góðu skólastarfi er góð samvinna foreldra, nemenda og starfsfólks skólans.

 

Þetta skólaár erum við að byggja upp og þróa framsækið og heildstætt skólastarf með lengdri viðveru starfsfólks og nemenda og þar sem kennsla, heimanám og frístundir eru í samfellu. Við viljum leggja rækt við vellíðan nemenda og starfs­fólks, sem er undirstaða ánægjulegs vinnustaðar. Við munum halda áfram að vinna að vistvænni hegðun og leggjum áherslu á að Öxarfjarðarskóli sem þjóðgarðsskóli geri sér far um að nemendur kynni sé stórbrotna náttúru nærumhverfisins.

 

Að lokum viljum við þakka foreldrum/forráðamönnum og öðrum velunnurum fyrir þá velvild sem þeir hafa sýnt starfi skólans í vetur og ítreka að dyr skólans standa ykkur ávallt opnar og við tökum fagn­andi þeim gestum sem heimsækja okkur í skólann og svörum gjarnan þeim spurn­ingum sem upp kunna að koma.

 

 

Með vinsemd og virðingu

fh. starfsfólks Öxarfjarðarskóla

 

Guðrún S. Kristjánsdóttir

skólastjóri

 

Ritstjórapistill

Hve feginn vildi ég enn fyrir yður brýna:
hvert einstakt líf, það biður um samhjálp þína.
(Bertolt Brecht, þýð. H. K. Laxness)

Frjálslynd mannúðarstefna

Einstaklingurinn er grunneining samfélagsins. Einstaklingur setur mark á samfélag sitt með orðum sínum og gjörðum, en gjörðir annarra, leikreglur samfélagsins og tíðar­andi, móta hann. Örlög hans eru órjúfanlega samofin örlögum annarra manna. Enginn er ey­land.

Til að samfélag fái notið allra krafta sinna þarf hver einstaklingur að vera frjáls til orðs og æðis innan þeirra marka sem sömu réttindi annarra manna setja honum. Hann þarf að virða rétt annarra til að haga lífi sínu á annan veg en hann sjálfur kýs. Hann þarf að vera reiðu­búinn í sókn og vörn fyrir þau gildi sem hann telur réttlát og skyn­samleg og hann þarf að vera reiðubúinn að endurskoða afstöðu sína ef hann reynist hafa á röngu að standa. Hann þarf að skilja að gagnrýni er forsenda umbóta og að rök­ræður og frjáls skoðana­skipti eru tæki til að bæta heiminn. Umburðarlyndi, réttlætis­kennd og hreinskiptni eru höfuð­dyggðir hins farsæla manns.

Bældir menn og undirgefnir eru ófærir um að móta samfélag sitt og þróa það á betri veg. Hæfileikar þeirra fara í súginn, sérkenni þeirra glatast og samfélagið verður snauð­­ara og fábreyttara. Valdstjórn spillir einnig þeim sem ráða. Þeim verður tamt að sækja styrk sinn í formlegt vald stofnana og lagabálka fremur en rökræðu og samráð. Þeir telja gagnrýni jafngilda árás og umbótatillögur kalla þeir vantraust. Samfélag vald­­boðs og undirgefni er því allt í senn ófrjótt, óskilvirkt og ómennskt. Það er gróðrarstía spillingar og óheiðar­leika. Hræðslu­gæði koma í stað siðferðilegrar afstöðu. Hlýðni í stað frumkvæðis. Undan­brögð í stað áhuga.

Heimur í hnotskurn

Skólinn er heimur í hnotskurn. Í tíu ár er hverju barni gert að búa í þessum heimi og sú mótun sem það fær í heimi skólans verður drjúgur hluti heimanmundar þess. Sé heimur skólans heimur valdboðs og undirgefni munu nemendur hans draga dám af þeirri reynslu ævilangt. Skorti heim skólans gildismat um breytni er hætta á að þegna hans skorti sið­ferði­leg viðmið þegar á reynir. Sé virðingarleysi fyrir náunganum og skeyt­ingar­leysi um samfélag manna og umhverfi látið viðgangast í heimi skólans kann það einnig að verða freistandi valkostur síðar í lífinu. Sama máli gegnir um hið góða. Einkennist heimur skólans af trausti og gagnkvæmri virðingu, umburðarlyndi, hrein­skiptni og réttlætiskennd mun hann útskrifa siðferðilega ábyrga einstaklinga sem hafa til þess vilja og getu að bæta samfélag sitt og auðga það með framlagi sínu.

Tíminn

Auðvelt er að sannreyna að tiltekinn nemandi hafi sótt þær kennslustundir sem honum bar samkvæmt viðmiðunarreglum yfirvalda. Erfiðara er að sannprófa að hann hafi hlotið kennslu og námsefni við hæfi og erfiðast að fullyrða að hann hafi beint orku sinni og áhuga að þeim viðfangsefnum sem skólinn ætlaði honum að sinna. Öll þekkjum við ein­stakl­inga sem fengu steina fyrir brauð alla sína skólagöngu og voru í raun í eins ­konar fangelsi skólaskyldunnar. Bandaríski félagssálfræðingurinn William Glasser segir reyndar í bók sinni Skóli án tapara, að einungis í skólum og fangelsum skipti sá tími sem varið er á staðnum meira máli en sú vinna sem innt er af hendi.

Þessi kenning Glassers vakti undirritaðan til umhugsunar um hlutverk tímans í skóla­starfinu og mikilvægi þess að nemendur upplifi hann sem sína eign. Til þess þarf nem­and­inn að hafa ráðstöfunarrétt yfir tíma sínum, að minnsta kosti að hluta. Hann þarf að finna, að með skipu­lögð­um vinnubrögðum getur hann í senn uppfyllt kröfur skól­ans um afköst og verklag og jafnframt skapað sér frjálsan tíma sem hann hefur fullt vald til að ráð­stafa í samræmi við eigin áhugamál. Með þessu móti falla skyldur og réttindi í einn farveg þegar vel tekst til. Skyldustörf og áhugamál, vinna og leikur verða merkingarbær heild og nemandinn lærir að stjórna lífi sínu og tíma í stað þess að vera meira eða minna nauðugur þolandi skylduvistar í skóla. Undirritaður leyfir sér að fullyrða að ekkert eitt ráð sé betri vörn gegn skólaleiða og þeirri uppreisnarþörf sem af honum leiðir.

Hugmyndalegt samhengi

Skólasýn og agastefna Öxarfjarðarskóla á rætur í mannskilningi og samfélags­hug­sjón­um frjáls­lyndra heimspekinga á borð við John Stuart Mill, Karl R. Popper og John Rawls, uppeldisspekinga á borð við John Dewey og Mariu Montessori, félags­sálfræð­inga á borð við William Glasser, Thomas Gordon og Dianne Gossen og gagnrýninna hugsuða á borð við John Holt, Nils Christie og Jock Young. Þá sækir Öxarfjarðar­skóli hugmyndir til þeirrar hreyfingar í menntamálum sem kennd er við opna skóla og opnar skólastofur og rekja má til Bretlands, Bandaríkjanna og síðast en ekki síst til íslenskra skóla sem margir hverjir hafa tileinkað sér hugmyndafræði opna skólans.

Um Litla-Vísi

Dagana 13. og 14. mars 2003 heimsóttu starfsmenn Öxarfjarðarskóla Hallorms­staða­skóla og nutu frábærrar gestrisni skólastjórnenda, ann­arra starfs­manna og nem­enda.

Ég er sannfærður um að hópurinn okkar hafði ómetan­legt gagn af heimsókninni að Hallormsstað og gæti rökstutt það á ýmsa vegu. Læt nægja að nefna þá bjargföstu trú mína að frá­bær verk valdi óafturkræfum breytingum á þeim er þeirra njóta. Gildir þá einu hvort um er að ræða listilegan smíðisgrip, leiksýningu, ljóð, mynd eða framúr­skarandi skóla. Menn ganga ríkari frá listaverkinu, betri menn og menntaðri. Mæli­kvarðar hafa breyst, viðmið hækkað. Skólastarfið á Hallormsstað er verk af þessum gæða­flokki og það lét ekkert okkar ósnortið.

Ég nefni þetta hér til að þakka Sif Vígþórsdóttur skólastjóra á Hallormsstað og sam­starfs­fólki hennar fyrir það einstaka örlæti að heimila okkur að nota og misnota Skóla­nám­skrá Hallormsstaðaskóla að vild við frágang Litla-Vísis. Efnisþættir og efnistök í Litla-Vísi eru að verulegu leyti sniðin eftir henni. Ég færi henni okkar bestu þakkir fyrir ómetanlega aðstoð.

Starfsmönnum Öxarfjarðarskóla þakka ég ánægjulegt samstarf við gerð Litla-Vísis. Við höfum rætt textann ítarlega á starfsmannafundum og lagt okkur fram um að gera hann sem best úr garði.

 _________________________________

Pétur Þorsteinsson

Efst í efnisyfirlit

Skólastefna Öxarfjarðarskóla

Lögum samkvæmt er hlutverk grunnskólans að búa nemendur undir líf í lýðræðis­þjóð­­félagi sem er í sífelldri þróun. Öxarfjarðarskóli telur að það verði best gert með því að veita hverju barni færi á að rækta sérkenni sín og hæfileika, taka ábyrgð á eigin breytni og hlutdeild í mótun skólasamfélagsins. Hvert barn þarf að skynja að framlag þess skiptir máli fyrir þróun samfélagsins; að breytni þess hefur áhrif á líðan annarra og að vel­ferð þess er órjúfanlega samofin velferð þeirra. Ræktun ein­staklings­eðlis og sam­­líðan með náunganum eru ekki andstæður heldur tvær hliðar á sama peningi. Lýð­ræðis­­þjóð­félag í sífelldri þróun þarf þetta tvennt.

Skóli - umhverfi - samfélag

Grunnskólinn er órjúfanlegur hluti þess samfélags sem hann þjónar. Hvorugt þrífst án hins. Góður skóli er ein styrkasta stoðin í framsýnu byggðarlagi. Hann þarf í senn að koma nemendum til fyllsta þroska og efla og auðga menningarlegt umhverfi þeirra.

Starfsfólk Öxarfjarðarskóla vill skapa heildstæðan skóla þar sem kennsla, nám, heimanám og frístundir eru í samfellu. Við viljum tengja starf skól­ans við náttúru svæðisins, atvinnu og lífs­hætti íbúanna og fyrri reynslu nemenda. Við viljum hlúa að rótum samfélagsins og kenna nem­endum að meta uppruna sinn og umhverfi að verðleikum. Starfið í skól­an­um á að nýta sér kosti, sérstöðu og séreinkenni byggðar­lagsins og stuðla að frekari þróun og upp­bygg­­ingu þess.

 

Öxarfjarðarskóli er fámennur skóli og þess vegna er þremur til fjórum árgöngum skip­að saman í námshóp. Fámennið auðveldar okkur að þekkja stöðu hvers nemanda og mæta sérkennum hans og sérþörfum. Starfsfólk skólans vill nýta kosti sam­kennsl­unn­ar og hyggst afla sér frekari þekkingar á því sviði, til dæmis með auknu samstarfi við Sam­tök fámennra skóla og einstaka skóla, svipaðrar gerðar, sem náð hafa framúr­skarandi árangri.

 

Í Öxarfjarðarskóla er stefnt að því að nota fjöl­breyttar kennsluaðferðir. Lengd viðvera, sveigjan- legur vinnu­tími, val­kerfi og vinnusamningar, einstaklings­kennsla, hóp­­vinna, samvinnunám og margt fleira eru hugtök sem einkenna skóla­starfið. Kennslu­aðferðir henta nem­­endum, aldurs­hópum og náms­greinum misvel og vill skólinn koma til móts við mis­mun­andi þarfir með fjölbreyttum vinnu­aðferðum. Það er stefna skól­­ans að kenna nem­endum notadrjúg vinnu­brögð. Leggja ber áherslu á að nemendur kynn­ist mis­mun­andi vinnu­aðferð­um, þannig að þeir geti gert sér grein fyrir því hvaða leið hentar þeim hverju sinni. Þótt vissu­lega sé mikil­vægt að nem­andinn tileinki sér þau þekkingar­atriði sem til er ætlast, telja kennarar skól­ans ekki síður mikil­vægt að nem­end­ur læri vinnubrögð sem nýtast þeim í flóknu sam­fél­agi nútímans og auð­velda frekara nám.

Nemendur

Í Öxarfjarðarskóla er nemandinn settur í önd­vegi í skólastarfinu; menntun hans, al­hliða þroski og líðan. Skólanum ber að örva nem­endur til sjálfstæðrar hugsunar, rækta með þeim víðsýni og umburðarlyndi og styrkja á alla lund forsendur þeirra til að bæta umhverfi sitt. Skólinn á að opna augu nemenda fyrir mikilvægi menntunar og nauð­syn þess að miðla reynslu og þekk­ingu manna á meðal. Skólanum ber að rækta fegurðarskyn nemenda og hvetja þá til að njóta góðra listaverka, bókmennta, tónlistar og myndverka, með opnum huga.

 

Í skólanum er lögð áhersla á að nemendur læri mikið og að þeim líði vel. Líðan og náms­framvinda eru órjúfanlega tengd. Ef nemanda líður illa vill skólinn bæta úr því með skjótum hætti. Nemendur þurfa að tileinka sér bóklega og verklega þekkingu og tækni, en ekki síður að temja sér farsæl samskipti við fólk; fólk á ýmsum aldri, af ólíkum upp­runa, gætt mismunandi hæfileikum, af báðum kynjum, fatlað og ófatlað. Jákvæð og upp­byggileg samskipti við ólíka einstaklinga stuðla að góðri líðan og aukn­um þroska, víðsýni og umburðarlyndi.

 

Í Öxarfjarðarskóla leggjum við mikla áherslu á að með auknum aldri og þroska axli nem­endur sívaxandi ábyrgð á eigin námi undir leiðsögn kennara sinna. Við teljum mikil­­vægt að nemendur temji sér að skipu­leggja viðfangsefni sín og vinnutíma innan þess ramma sem lög og reglugerðir setja skól­­­anum. Við teljum að verk­lag af þessu tagi og það viðhorf til náms sem það byggir á sé afar mikilvægt veganesti fyrir nem­endur okkar þegar þeir hefja nám í framhaldsskóla, fjarri heimilum sínum, að loknu grunnskóla­prófi. Nemandinn þarf að hafa svigrúm til að rækta áhugamál sín og sérgáfur. Hann þarf einnig að hafa tíma til að leika sér með skóla­félögunum, enda er leikurinn eðlileg námsleið barna og nauð­syn­leg þjálfun í mannlegum samskiptum og kemur lengd viðvera í Öxarfjarðarskóla til móts við þessar þarfir.

Starfsmenn

Starfsfólk skólans mótar skólaandann öðrum fremur með breytni sinni og fram­göngu. Það greinir rétt frá röngu með fordæmi sínu og viðbrögðum. Starfsfólk Öxar­fjarðar­skóla leitast við að búa nemendum sáttfúsan og rétt­látan heim þau tíu ár sem velferð þeirra er í þess höndum að hluta. Starfsfólkinu ber að sýna nem­endum fyllstu virðingu og ætlast til þess að nemendur sýni því og öllum öðrum sam­bæri­lega virðingu, þar með talið sjálfum sér.

 

Starfsfólk Öxarfjarðarskóla treystir því að nemendur kjósi að breyta rétt fremur en rangt, vegna þess að að þeir telji að annað sé ósamboðið virðingu sinni, en ekki sakir ótta við hegningu eða viðurlög. Þetta viðhorf leggur starfsfólki Öxarfjarðar­skóla jafn­framt þá skyldu á herðar að leggja sanngjarnt mat á breytni nemenda og láta skoðun sína í ljós. Það fagnar góðum verkum þeirra og ljúfmannlegri framkomu en sýnir andúð sína á meinstríðni, rudda­skap, frekju, hyskni og skemmdarfýsn, verði slíks vart. Umfram allt ber starfsfólkinu að hlúa að vinsemd, glað­værð og hjálp­semi hvenær sem færi gefst. Það er ófrávíkjanleg stefna skólans að nemendur geti treyst starfsfólkinu og leitað til þess þegar þeir þurfa á því að halda. Starfsfólk skólans er bundið fyllsta trúnaði um hvaðeina sem nemendur treysta því fyrir og sem það verður áskynja í starfi sínu. Þó ber að hafa í huga, að samkvæmt Barnaverndar­lögum gengur tilkynningar­skylda þeirra sem afskipti hafa af börnum fram­ar þagnarskyldu ef ætla má að velferð barns eða heilsu sé veruleg hætta búin.

Starfsfólki Öxarfjarðarskóla ber að hugleiða stöðu hvers barns sérstak­lega og leiðbeina því um þau atriði er betur mega fara með hliðsjón af stöðu þess og getu. Það gildir jafnt um félagslega stöðu þess í skólasamfélaginu og stöðu þess í námi. Líta ber á einstakl­ing­inn í heild sinni og minnast þess að öryggi og vellíðan á vinnustað er forsenda góðra vinnu­bragða. Starfsfólki Öxarfjarðar­skóla ber að gera miklar kröfur til hvers nemanda, en sníða jafnframt kröfurnar að þroska og getu hvers og eins.

 

Gagnkvæmt traust og virðing allra sem í skólanum starfa tryggir glaðan og frjálslegan skólaanda og hvetur nemendur og starfsmenn til að leggja sig fram í störfum sínum.

Heimili og skóli

Til að tryggja farsælt nám og góða líðan hvers nemenda telur skólinn afar mikilvægt að eiga gott samstarf við heimili hans. Foreldrar þekkja börn sín betur en nokkur annar og eru í raun sérfræðingar í málum þeirra. Þeir gæta réttinda barna sinna í hvívetna og tala máli þeirra þegar þess gerist þörf. Starfsfólk Öxarfjarðar­skóla heitir því að taka ábend­ingum foreldra og nemenda um hvaðeina sem betur má fara með fullri vinsemd og í fullri alvöru. Hagsmunir barnsins eru sam­eigin­­legt leiðar­hnoða for­eldra þess og starfs­manna skólans og í sameiningu móta þeir það umhverfi og þær leiðir sem því eru fyrir bestu. Heimili og skóli eru bandamenn og milli þeirra verð­ur að ríkja óskorað traust.

 

Foreldrar eru ævinlega aufúsugestir í skólanum og það er mikilvægt að þeir hafi sam­band við kennara og skólastjórnendur hvenær sem þeir telja þess þörf eða spurningar vakna. Við heitum jafnframt á foreldra að taka ábendingum skólans vel og hlúa að já­kvæðu viðhorfi barna sinna til skólans, starfsmanna hans, skólafélaga og eigin náms. Takist okkur að fella þekkingu og reynslu foreldra og starfsfólks í einn farveg, sköp­um við í sameiningu góðan skóla þar sem börn okkar og unglingar komast til farsæls þroska, sjálfum sér og samfélaginu til hagsbóta.

Efst í efnisyfirlit

Agi og umgengni 

Skólareglur

 

Eftirfarandi þætti skulum við tileinka okkur:

 

Heiðarleiki og réttlætiskennd

·     segjum hreinskilnislega frá mistökum okkar

·     reynum alltaf að bæta fyrir mistök okkar og læra af þeim

·     komum aldrei sök á aðra

·     forðumst hvísl og baktal

·     virðum eignir annarra

·     aðstoðum þá sem eru yngri eða minnimáttar og stöndum með þeim sem eiga fáa vini

·     látum starfsfólkið vita tafarlaust ef stöðva þarf slagsmál eða rifrildi

·     förum ekki inn á leikskóla án leyfis

 

Prúðmennska og tillitssemi

·     hjálpumst að við að skapa friðsælt og öruggt umhverfi í skólanum

·     forðumst hlaup og ólæti í skólahúsinu

·     látum reiðina bitna á boltanum en ekki skólafélögum í íþróttum

·     verum tillitssöm hvert við annað, starfsmenn skólans og gesti

·     sýnum hvert öðru kurteisi og hlýju

·     tökum ekki þátt í stríðni eða einelti

·     tökum vel á móti nýjum nemendum

 

Samviskusemi og ástundun

·     vinnum mikið og vöndum okkur við öll verkefni

·     notum dagbókina til að skipuleggja vinnutíma og heimanám

·     reynum að standa alltaf við vinnusamninga

·     virðum vinnufrið í kennslustundum

·     nýtum vinnutímann vel og sköpum með því tíma sem við eigum sjálf

·     verum góð fyrirmynd þeirra sem yngri eru

 

Stundvísi

·     verum stundvís í skólabíl að heiman og við heimferð

·     mætum stundvíslega í kennslustundir og í matsal

·     látum ávallt vita um veikindi eða önnur forföll

·     biðjumst afsökunar ef við komum of seint

 

Umgengni

·     höldum skólahúsnæði snyrtilegu og hreinu

·     hendum hvorki rusli á skólalóðina né annars staðar utandyra

·     látum hvern hlut á sinn stað

·     virðum verk annarra

·     förum vel með alla hluti úti sem inni

·     skemmum ekki húsnæði, námsgögn eða aðrar eigur skólans

·     komum ekki með peninga í skólann að þarflausu

·     við erum sjálf ábyrg fyrir peningum eða öðrum verðmætum sem við komum með í skólann

·     förum ekki með mat eða drykki út úr matsalnum í Lundi og aldrei með drykki inn í tölvustofurnar

·     tökum þátt í því að halda matsalnum í Lundi snyrtilegum, m.a. með því að sópa gólfið ogstrjúka af borðum.

·     gosdrykkir og sælgæti er einungis leyfilegt í skólanum á sérstökum stundum samkvæmt ákvörðun skólastjóra eða kennara hverju sinni

·     öll notkun tóbaks og hvers kyns vímuefna er stranglega bönnuð í skólanum, í nágrenni hans og í ferðum á vegum skólans

 

Útivist

·   venjum okkur á að fara út og hreyfa okkur þegar færi gefst og til þess er ætlast

·   notum alltaf reiðhjólahjálm þegar við erum á hjóli. Enginn hjálmur - ekkert hjól.

 

 

Efst í efnisyfirlit

 

Viðurlög við brotum á skólareglum Öxarfjarðarskóla

 

Markmið agastjórnunar er að byggja nem­end­­ur upp en alls ekki að niðurlægja þá eða brenni­merkja. Brjóti nemandi gegn reglum skólans skal ávallt lögð áhersla á að leita leiða sem bæta hegðun hans og líðan. Viður­lög verða að hæfa brotinu og taka mið af að­stæð­um hvers nemanda fyrir sig. Aldrei má beita harðari úrræðum en nauðsynlegt er, samanber meðal­hófsreglu íslensks réttarfars, og ævinlega ber að virða réttindi barnsins eins og þeim er lýst í íslenskum lögum og alþjóð­legum sáttmálum. Þá skal þess jafnan gætt að leita samstarfs við foreldra eða for­ráða­­menn nemandans og gæta andmælaréttar þeirra sem málið varðar.

·     Nemendur eru ábyrgir fyrir því tjóni sem þeir kunna að valda á eignum skólans, starfs­fólks eða skólafélaga sinna. Týni nemandi námsgögnum sem skólinn lánar honum eða valdi á þeim óeðlilegum skemmdum skal viðkomandi bæta tjónið.

 

·     Brjóti nemandi af sér, skal umsjónarkennari, skólastjóri, aðstoðarskólastjóri eða sér­fróð­ur ráðgjafi ræða við nemandann um hegðun hans til þess að nemandi geri sér grein fyrir eðli brotsins og afleiðingum þess.

 

·     Gerist nemandi sekur um mjög alvarlegt brot á skólareglum eða landslögum, hvar sem hann er staddur á vegum skólans, er skólanum heimilt að senda hann heim á kostnað forráðamanna sinna.

 

·     Ef nemandi lætur sér ekki segjast, þrátt fyrir undangengnar viðvaranir og áminningar, er heimilt að vísa honum úr kennslu og láta hann fást við önnur verkefni það sem eftir lifir skóladags. Við beitingu slíkra viðurlaga skal tryggt að nemandi sé í umsjá starfs­manns á vegum skólans. Komi til brottvísunar sækir nemandinn ekki kennslustund hjá viðkomandi kennara fyrr en að afloknu við­tali. Umsjónarkennara skal gerð grein fyrir agabroti nemandans og skal hann láta forráðamann nemandans vita.

 

·     Ef nemandi gerist sekur um mjög alvarleg eða síendurtekin brot á skólareglum er heimilt að vísa honum tímabundið úr skóla meðan leitað er lausna í málum hans. Tilkynna ber forráðamönnum og skólanefnd tafarlaust um ákvörðun skólayfirvalda. Takist skólastjóra ekki að leysa vanda nemanda innan skóla á viku vísar hann málinu til skólanefndar. Skólanefnd tekur málið til úrlausnar, útvegar nemandanum tafarlaust viðeigandi kennsluúrræði og beitir sér fyrir úrbótum í samráði við alla aðila málsins. Skólanefnd ber ábyrgð á að innan þriggja vikna frá brottvísun hafi nemanda verið tryggð skólavist. Takist enn ekki að leysa málið getur hvor aðili, forráðamenn eða skólanefnd, vísað ágreiningi til úrlausnar og úrskurðar menntamálaráðuneytisins.

 

Starfsmönnum skóla er óheimilt að neyta afls­munar nema nauðsyn krefji til að stöðva ofbeldi eða koma í veg fyrir að nemandi valdi sjálfum sér eða öðrum skaða eða eignatjóni. Í tilvikum sem þessum skal ávallt greina forráðamönnum tafarlaust frá málavöxtum.

Forföll og leyfi

Foreldrar eru vinsamlegast beðnir að tilkynna forföll til skólastjórnenda eða viðkomandi um­sjónarkennara, sem og að láta skólabílstjóra for­taks­laust vita ef barn þeirra mætir ekki í skóla­bíl. Umsjónarkennari getur staðfest leyfi í einn til tvo daga, en ef um lengri tíma er að ræða skal hafa samband við skólastjóra eða aðstoðar­skólastjóra

Efst í efnisyfirlit