Öxarfjarðarskóli

Skóladagatöl 2026-27 og Skólapúls

Wed, 08 Apr 2026 11:04:00 +0000

Skólaráð og stjórn foreldrafélags Öxarfjarðarskóla komu saman 25.mars sl. og ræddu skóladagatöl leik-og grunnskóladeildar fyrir næsta skólaár 2026-2027 og voru þau samþykkt. Þá hafa þau þegar verið kynnt í fjölskylduráði. Einnig voru niðurstöður kannana Skólapúlsins ræddar en Skólapúlsinn var í fyrsta skipti notaður í skólanum þetta skólaárið. Hingað til hefur verið notast við heimagerðar kannanir sem hafa alveg þjónað tilgangi sínum ágætlega en Skólapúlsinn gefur samanburð við landið og gaman að skoða hann þannig. Óhætt er að segja að niðurstöðurnar séu góðar fyrir skólann okkar en alltaf má bæta um betur.

Veðurviðvörun - skóla lokið um hádegi

Thu, 26 Mar 2026 07:27:00 +0000

Vegna slæmrar veðurspár seinnipartinn í dag, fara skólabílar frá skólanum kl. 12:30.

Góð gjöf frá skákfélaginu Goðanum

Wed, 11 Mar 2026 14:27:00 +0000

Skákfélagið Goðinn undir leiðsögn Hermanns og Hilmars hafa verið með skákkennslu í Öxarfjarðarskóla í vetur fyrir alla aldurshópa. Þeir hlutu til þess styrk frá Norðurþingi og hefur kennslan farið fram mánaðarlega síðan í september en nú fer að líða að lokum. Í gær komu þeir færandi hendi og gáfu skólanum 10 skáksett sem við erum afskaplega þakklát fyrir. Hér má sjá nokkra af skákmönnum framtíðarinnar sem hafa verið áhugasamir í vetur.

Menntastefna Norðurþings

Wed, 11 Mar 2026 10:30:00 +0000

Nýendurskoðuð Mennta- og læsisstefna Norðurþings 2026-2031 hefur verið samþykkt í sveitarstjórn Norðurþings sem byggir á skólastefnu frá 2020. Samkvæmt lögum um leik- og grunnskóla skal hvert sveitarfélag setja sér stefnu um skólahald og nær þessi nýja menntastefna yfir alla starfsemi leikskóla, grunnskóla og tónlistarskóla Norðurþings. Búið er að kynna stefnuna fyrir starfsfólki leik- og grunnskóla og eru foreldrar hvattir til að kynna sér hana hér: https://www.nordurthing.is/static/files/Menntun/mentastefna-nordurthings.pdf

ÓLD SKÚL og Benni Hemm Hemm

Fri, 06 Mar 2026 14:56:00 +0000

Öxarfjarðarskóli er þátttakandi í verkefni sem kallast ÓLD SKÚL og er á vegum Lókal performing arts sem er í eigu Ragnheiðar Skúladóttur og Bjarna Jónssonar. Þau sóttu um styrk til Öxarfjarðar í sókn fyrir verkefnið sem snýr að því að þróa listamannadvöl og námskeiðahald tengdu listum, sögu og náttúru, í samvinnu og samstarfi við hagsmunaaðila í Öxarfirði, þátttakendum að kostnaðarlausu. Við njótum meðal annars góðs af því hér í Öxarfjarðarskóla með umræddu verkefni í samstarfi við Benna Hemm Hemm tónlistarmann sem er nú búinn að vera í vinnu með unglingadeildinni í tvo daga.

Samfélagið í nærmynd

Mon, 16 Feb 2026 11:13:00 +0000

Yngsta stig Öxarfjarðarskóla hefur undanfarnar vikur verið að vinna í þema sem nefnist “Samfélagið í nærmynd”. Þar er aðaláherslan á að nemendur kynnist sinni heimabyggð og þekki sögu og einkenni hennar. Það er ýmislegt sem nemendur hafa fengist við, t.d. semja spurningar fyrir góða gesti og spyrja þá spjörunum úr, sett saman nafnlausa könnun um heimilisverk, farið í vettvangsferð um samfélagið, kortlagt fyrirtæki, sveitabæi og íbúðarhús, spáð í grunnþjónustu, velt fyrir sér jafnrétti, kynjahlutverkum og margt fleira. Við viljum þakka fyrir frábærar móttökur í fyrirtækjunum sem heimsótt voru sem og öllum þeim sem lögðu okkur lið í þessu verkefni.

Þorrablót Öxarfjarðarskóla

Thu, 12 Feb 2026 16:53:00 +0000

Þorrablót skólans var haldið 29. janúar sl. Góð mæting var hjá foreldrum og systkinum og stóðu nemendur sig vel með skemmtiatriði og veislustjórn. Heiðný og Valur voru kynnar kvöldsins en Sigurður matráður sá um matinn og spilaði einnig undir fjöldasöng. Yngri deildin söng nýjan texta við lagið "Róa" sem var framlag Íslands í fyrra í Eurovision og mið-og unglingadeild voru með nokkur myndbönd sem innihéldu m.a. kennaragrín og fleira. Myndböndin eru komin hér á heimasíðuna undir flipanum *Nemendur* > Myndbönd

Skapandi skrif

Mon, 09 Feb 2026 09:08:00 +0000

Í síðustu viku kom Þorgrímur Þráinsson rithöfundur til okkar með skapandi skrif. Mið- og unglingadeild tóku þátt í verkefninu sem miðar að því að nemendur eru látnir fá nokkrar kveikjur til að skrifa út frá. Þorgrímur fékk góðar viðtökur og áfram verður haldið með verkefnið innan skólans. Allir nemendur fengu að lokum áritaðar bækur eftir Þorgrím að gjöf.

Heiðný áfram í smásagnasamkeppi!

Tue, 03 Feb 2026 10:15:00 +0000

Annað árið í röð erum við stolt af því að eiga nemanda sem tók þátt í smásagnasamkeppni Risastórra smásagna. Að þessu sinni er það Heiðný í 4. bekk sem sendi inn smásöguna sína "Hryssan og folaldið" inn í smásagnasamkeppnina og var fallega sagan hennar valin áfram. Heiðný mun fá tíma með ritstjóra næstu helgi til að fara yfir söguna og betrumbæta ef þarf áður en hún verður gefin út. Bókmenntaborg UNESCO lætur prenta bókina handa verðlaunahöfunum sem allir fá eitt eintak fyrir sjálfa sig og annað handa skólunum. Sagan hennar var lesin upp í gryfju og fékk hún afar góðar viðtökur! Við óskum Heiðnýju innilega til hamingju með árangurinn og óskum henni góðs gengis áfram!

Félagslegir töfrar

Mon, 02 Feb 2026 16:40:00 +0000

Dr. Viðar Halldórsson hélt fyrirlestur fyrir mið- og unglingastig í dag sem bar yfirskriftina "Félagslegir töfrar". Fyrirlesturinn fjallaði um hvernig félagslegir töfrar myndast í samskiptum fólks og stuðla að vellíðan og árangri einstaklinga og hópa. Heimsóknin var í boði HSÞ, Kvenfélagasambands Suður Þingeyjarsýslu og Búnaðarsambands Suður Þingeyjarsýslu.

Samfélagslögreglan í heimsókn

Fri, 16 Jan 2026 11:28:00 +0000

Í vikunni fengum við heimsókn og fræðslu frá samfélagslögreglunni. Þeir sögðu frá starfinu og ræddu einnig við nemendur um notkun samfélagsmiðla, útivistarreglur, aðgát við umferðargötur og reglur í sambandi við hjól og notkun hjólahjálma. Nemendur voru duglegir að spyrja og fengu einnig að skoða vesti lögreglumannanna og handjárnin sem þóttu mjög spennandi. Gaman að fá lögregluna í heimsókn.

Gjaldskrárhækkanir

Mon, 12 Jan 2026 11:09:00 +0000

Nýjar gjaldskrár hafa tekið gildi frá og með 1.janúar 2026 og birtar á heimasíðu Norðurþings

Litlu jólin - Gleðileg jól

Fri, 19 Dec 2025 16:11:00 +0000

Í dag voru litlu jólin haldin hátíðleg með hátíðarmat, stofujólum og dansi í kringum jólatréð. Foreldrar og aðrir aðstandendur komu og tóku þátt í gleðinni á jólaballinu. Að venju litu jólasveinarnir við hjá okkur og vöktu kátínu ungra sem aldinna.

Jólaföndurdagur

Thu, 11 Dec 2025 09:15:00 +0000

Í gær var haldinn árlegur jólaföndurdagur í skólanum þar sem nemendur, starfsfólk, foreldrar, afar og ömmur komu saman og áttu góða stund við föndur og spjall.

Starfsáætlun skólaársins 2025-2026

Tue, 02 Dec 2025 14:35:00 +0000

Starfsáætlun skólaársins 2025-2026 hefur verið tekin fyrir af skólaráði Öxarfjarðarskóla og Fjölskylduráði Norðurþings. Hana má finna hér á vefnum undir *Skólinn* > * Starfsáætlun*

Tendrað á jólatrénu

Tue, 02 Dec 2025 09:14:00 +0000

Í morgun var tendrað á fallega jólatrénu sem hefur verið fenginn nýr staður og er núna á grasflötinni fyrir utan skólann. Nemendur og leikskólabörn ásamt starfsfólki sungu nokkur jólalög í kringum tréð sem var hressandi í morgunsárið.

Vel heppnuð árshátíð að baki

Mon, 01 Dec 2025 14:04:00 +0000

Föstudaginn 28.nóvember var árshátíð skólans haldin í Skúlagarði þar sem nemendur úr öllum deildum skólans stigu á svið ásamt elstu börnum leikskólans.

Árshátíð Öxarfjarðarskóla verður haldin 28.nóvember

Wed, 26 Nov 2025 15:43:00 +0000

Sjáumst í Skúlagarði föstudaginn 28.nóvember kl. 17:00

Undirbúningur árshátíðar

Fri, 21 Nov 2025 14:51:00 +0000

Síðustu vikur hafa litast af undirbúningi árshátíðar skólans sem haldin verður í Skúlagarði föstudaginn 28.nóvember kl. 17:00. Nemendur og kennarar hafa haft í nógu að snúast við að útbúa leikmyndir, leikmuni, búninga en ekki síst æfingar á textum og lögum.

Úrslit Svakalegu upplestrarkeppninnar

Tue, 18 Nov 2025 12:00:00 +0000

Úrslit Svakalegu lestrarkeppninnar liggja fyrir og hafnaði Öxarfjarðarskóli í 7. sæti af 20! Vel gert hjá okkar nemendum. Í gær héldum við upp á Dag íslenskrar tungu sem markar jafnframt upphafið að æfingum á vönduðum upplestri í takti við Stóru upplestrarkeppnina. Við munum síðan halda okkar eigin uppskeruhátíð á vordögum.