Fréttakorn frá Öxarfjarðarskóla

19.09.2008

Nú er fjórða vikan senn á enda og ýmislegt hefur verið starfað í skólanum. Flutningar eru að hefjast hjá kennurum yfir í betra rými, þar sem við höfum nú fengið íbúðina fyrir vinnuaðstöðu. Þá munu unglingar fá eigið herbergi til afnota þar sem kennarastofan var.

Íþróttakennslan hefur eingöngu farið fram utandyra vegna lagfæringar á íþróttahúsi og hefur ýmislegt verið tekið fyrir. Má þar nefna nokkurskonar “Boot Camp” æfingar þar sem nemendur eru í strangri þjálfun undir stjórn Þorsteins og vita fátt skemmtilegra en að fá að skríða á jörðinni í bland við magaæfingar ofl. Þá hefur körfuboltinn verið talsvert æfður sem og aðrar hefðbundnar íþróttir. Hávaðarok hefur verið undanfarna daga og þá eru góð ráð dýr þegar ekki er hægt að flýja inn! Það gerði það að verkum að nemendur eru m.a. búnir að læra að sippa í 20 metrum á sekúndu. ;)

Frá yngri deild og leikskóla

Líf og fjör hefur einkennt starfið í yngri deild og ýmislegt brallað þar á bæ. Búið er að koma upp vísi að útieldhúsi á tjaldsvæðinu þar sem heimilisfræðin mun fara fram að hluta til. Nemendur í yngri deild fóru út á mánudaginn var í sól og 17 stiga hita, tíndu sprek og tálguðu og grilluðu svo pylsur og brauð við opinn eld og drukku kakó. Síðan var sungið og farið í leiki. Nú er hafið markvisst samstarf milli leikskólans og yngri deildar þar sem komið er saman einu sinni í viku og hugað að málörvun, söng og hreyfileikjum undir stjórn Vigdísar og Elísabetar, einnig eru nemendur miðdeildar með í söngnum. Þetta hefur mælst vel fyrir, allir virkir og söngurinn ómar fram á gang. (skoða myndir)

Frá miðdeild

Lífið gengur sinn vanagang og allir í lærdómsgírnum. Í heimilisfræðinni er búið að bralla ýmislegt, tína ber og sulta og búa til haustskreytingar fyrir borð sem hægt verður að nota á haustgleðinni sem er á dagskrá 23. október nk.

Frá unglingadeild

Búið er að kjósa í nefndir og ráð og úrslit voru eftirfarandi:

Nemendaráð: Jóhanna Margrét 10. bekk Freydís Rósa 10. bekk Arnar Þór 9. bekk Sylvía Dröfn 9. bekk Daníel Atli 8. bekk Bergvin Máni 8. bekk	Ritnefnd: Sandra Björk 9. bekk Jónína Kristín 9. bekk Anna Karen 8. bekk Rakel Sif 8. bekk
Íþróttanefnd: Heimir 10. bekk Andri Þór 10. bekk Elvar Þór 10. bekk Magnús Orri 9. bekk Hafþór Ingi 9.bekk	Leiklistarnefnd: Margrét Sylvía 9. bekk María Dís 8. bekk Bryndís Edda 8. bekk Ásdís Hulda 8. bekk
Umhverfisnefnd: Auður 10. bekk Guðrún 10. bekk

Þá var ákveðið að setja á stofn sérstaka fjáröflunarnefnd vegna Danmerkurferðar 9. og 10. bekkja í vor. Fjáröflunarnefnd hefur það hlutverk að skipuleggja fjáraflanir í samstarfi við skólann og foreldra. Nefndina skipa:

Auður 10. bekk
Elvar Þór 10. bekk
Sylvía Dröfn 9. bekk
Hafþór Ingi 9. bekk.

Í næstu viku munum við senda valblöð heim með nemendum og þá geta þau valið í samráði við foreldra um fjórar valgreinar; heimilisfræði, hljómsveitarval, handmennt og spænsku. Nánari lýsing á valgreinum mun verða á blöðunum.

Heildstæður skóli hefst svo í byrjun október og munum við senda nánari upplýsingar þegar nær dregur.

Foreldrar og forráðamenn eru minntir á að hringja sjálfir ef nemendur þurfa að fá leyfi og er þá nóg að tala við umsjónarkennara viðkomandi en ef nemendur þurfa lengra frí en tvo daga ber að ræða það við skólastjóra.

Þorsteinn Hymer hefur fengið nýtt netfang: steini@kopasker.is og Gunna Magga hefur líka fengið nýtt netfang: gunnamagga@kopasker.is

Við minnum að lokum á starfsdaginn á í næstu viku, föstudaginn 26. september en þá verða kennarar á BKNE þingi á Akureyri.

Til baka