Fréttakorn í­ október

Nú heilsar annað fréttabréf skólaársins. Í því má m.a. lesa um Haustgleði, vettvangsnám kennara, foreldrafund, foreldrasamtöl, fræðslufund frá Fjölskylduþjónustunni o.fl. Fréttabréfið fer á vef skólans ásamt myndum úr starfi skólans og er líka sent út til þeirra sem ekki hafa aðgang að tölvu.

Smellið á lesa meira til að sjá pistiilinn.

Þessa dagana fer fram vettvangsnám Kristjáns Inga og Jóhönnu Elínar í tengslum við kennaranám þeirra í HÍ. Við vorum svo heppin að þau fengu að taka vettvangsnámið í sínum heimaskóla og prófa hugmyndir sínar þar. Við stokkum svolítið upp stundarskrá meðan á vettvangsnámi þeirra stendur og koma starfsmenn að hópunum með stuðning eftir þörfum.

Myndir frá vettvangsnámi Jóhönnu og Kristjáns Inga

Jóhanna er með metnaðarfullt þemaverkefni úr ull. Þetta er þæfingarverkefni sem tengist að hluta til jólunum. Það er gaman að fá að fylgjast með þessu starfi og streyma frá Jóhönnu og nemendum hennar stórskemmtilegir hlutir, þæfðir úr ull, s.s. jólasveinar, snjókarlar, jólakettir, skrautlegar jólakúlur, fallegir skartgripir o.fl.

Kristján Ingi er með þemaverkefni í dönsku og þar tengir hann unglingadeildina saman í samvinnuhópum þvert á aldur og er 7. bekkurinn með í því verkefni. Hrund stendur við hlið hans í þessu verkefni enda hans viððtökukennari. Þetta hefur gengið vel og mikilvægt að tengja aldurshópana saman á þennan hátt. Þessa dagana eru unglingadeildarnemendur, í tengslum við dönskunámið,  að útbúa stuttmynd sem tengist dönsku bókinni sem þau voru að lesa.

Anna Englund hefur verið dugleg að fara með nemendur út í heimilisfræði og fá þau að elda við opinn eld og fara í leiki. Myndir frá því eru hér.

Guðrún Margrét og Einar Magnús eru með valhóp í útikennslu á mánudögum. Þau hafa farið nokkur skipti í Akurgerði og verið að grisja þar og fá þar með efni til að nota í útikennslustofuna. Hér eru myndir úr síðustu ferð.

Við hvetjum ykkur til að líta á myndir úr starfi grunnskólans og leikskóladeildanna sem við erum nýbúin að setja á vef skólans.

Leikskóladeild Lundi

Í leikskóladeild Lundar eru 12 nemendur. Elstu börnin taka þátt í verkefninu Brúum bilið á mánudögum ásamt 1.– 2. bekk  grunnskólans. Meðan á sundnámskeiði stóð fóru börnin tvisvar í sund. Íþróttir eru á dagskrá einu sinni í viku og kemur iðjuþjálfi þar að og veitir ráðgjöf. Eins kemur sérkennari að starfi deildarinnar. Nemendur 10. bekkjar þær María, Magga og Sylvía eru í leikskólavali og koma inn í starfið einu sinni í viku – gengur mjög vel!!

Leikskóladeild Kópaskeri

Á Krílakoti á Kópaskeri rennur starfið vel af stað. Fjöldi nemenda á deildinni er 10 þegar flest er og verða 11 í nóv ember og eru starfsmenn 3. Fastir liðir verða í vetrastarfinu eins og síðustu vetur og má þar nefna íþróttahúsið og heimsóknir á bókasafnið. Gunna Magga kemur í heimsókn til okkar og veitir okkur ráðgjöf varðandi nemendur og svo fáum við Conny Spandau með okkur í íþróttahúsið. Helstu áherslur okkar í vetur verða á umhverfið, okkur sjálf, vináttuna og samskipti, leikinn og svo verður auðvitað litað, málað, púslað, perlað, pinnað og margt fleira. Myndir frá leikskólanum

Á döfinni:

• Föstudaginn 16. október fer vaskur hópur úr unglingadeild Öxarfjarðarskóla, í tengslum við björgunarsveitarvalið, upp á Öxarfjarðarheiði ásamt leiðbeinendum sínum þeim Þorsteini Hymer og Kristjáni Inga. Ekið verður upp á heiðina og gengið þaðan að gangnamannakofa Núpsveitunga og þar mun hópurinn gista. Gengið verður á Rauðhólana og gígarnir skoðaðir, sigið í helli, fundnir punktar á korti, gengið eftir áttavita að punktunum o.fl.

• Fræðslufundur um rafrænt einelti verður í skólanum þann 29. október og hefst kl. 17.00. Við hvetjum alla sem mögulega geta komið til að mæta. Í fyrirlestrinum verður m.a. fjallað um hvernig einelti birtist á netinu, hverjar afleiðingar þess geta verið og hvaða einstaklingar eru líklegir gerendur. Þá verður einnig fjallað um tengsl milli rafræns eineltis og þess eineltis sem við þekkjum í skólum og félagslífi. Farið verður yfir kynjamun þegar kemur að einelti og síðast en ekki síst hvað er til ráða.

• Starfsdagur kennara verður 2. nóvember og enginn skóli þann dag. Á starfsdaginn verður Ingibjörg Sigurjónsdóttir, sálfræðingur, með námskeið fyrir starfsfólk um ADHD, aðkomu að nemendum o.fl.

• Foreldrasamtöl verða  í byrjun nóvember sem munu standa í viku og við sendum út miða eða tölvupóst til foreldra um tímasetningu.

• Foreldrafundur er ráðgerður í nóvember

• Haustgleðin verður haldin 12. nóvember og þá er hugmyndin að hafa fjölþjóðakvöld.

• Sundúthaldi er lokið og eiga nemendur nú að mæta með íþróttafatnað í skólann.

• Stuttmyndanámskeið fyrir unglingadeild var í Lundi um síðustu helgi. Sumir eru að vinna að myndbandi í samkeppni fyrir 66°norður og nýtist þetta þeim eflaust. Unglingadeildarnemendur eiga í tengslum við dönskunámið þessar vikurnar að útbúa stuttmynd sem tengdist bókinni sem þau voru að lesa.

• Nemendur fengu ný valblöð með sér heim nú í vikunni fyrir næsta mánuð sem þeir eiga að skila á mánudag.

Að lokum viljum við minna á að foreldrar og forráðamenn nemenda eru ávallt velkomnir í skólann okkar hvort sem það er í heimsókn eða til þess að fylgjast með lífi og starfi í skólanum.