Hagnýtar upplýsingar

Hverjir eru vátryggðir? Slysatrygging skólabarna tekur til allra skólanemenda, sem eru skráðir í grunnskóla enda séu þessar stofnanir reknar af sveitarfélaginu. Aldur skólabarnsins skiptir ekki máli.

Hvenær gildir vátryggingin? Slysatrygging skólabarna gildir þann tíma sem skólinn er starfræktur. Er hér um að ræða venjulegan skólatíma og þess utan þann starfstíma sem ákvarðaður er af stjórnendum skóla og þessara stofnana.

Hvar gildir vátryggingin? Slysatrygging skólabarna tekur til hvers skólabarns sem verður fyrir slysi í skólanum og til eða frá heimili. Jafnframt gildir tryggingin á ferðalögum innanlands á vegum skólans hvert sem farið er og í hvaða skyni sem er.

Hvað felst í vátryggingunni? Slysatrygging skólabarna tekur til hvers skólabarns sem verður fyrir líkamstjóni eða dauða af völdum slyss, hvernig svo sem slysið ber að, hver svo sem á sök á því og hvort sem slysið verður við nám eða leik.

Vátryggingarfjárhæðir Hámarksfjárhæðir vegna andláts, örorku og slysakostnaðar koma fram á vátryggingarskírteini eða endurnýjunarkvittun.

Slysakostnaður - eigin áhætta Eigin áhætta í hverju einstöku tjóni vegna slysakostnaðar kemur fram á vátryggingarskírteini og/eða endurnýjunarkvittun. Slysakostnaður er eingöngu greiddur að því marki, sem hann fæst ekki greiddur úr öðrum vátryggingum eða Tryggingastofnun ríkisins. Fjárhæðir breytast í samræmi við framfærsluvísitölu.

Slysakostnaður. Með slysakostnaði er átt við útlagðan kostnað foreldra vegna bótaskylds slysaatburðar, t.d. óhjákvæmilegan ferðakostnað sem Tryggingastofnun ríkisins greiðir ekki. Afleiddur kostnaður, svo sem vinnutap foreldra, bætist ekki. Að öðru leyti gilda um tryggingu þessa almennir slysatryggingarskilmálar félagsins. Í löngu frímínútum kl.10:40-11:00 mega nemendur í 8.-10. bekk vera inni en aðrir eiga að vera utandyra og skólaliði og stuðningsfulltrúar sjá um gæslu

Skólaakstur

Helstu akstursleiðir eru:

• Kópasker-Lundur
• Fjöll-Lundur
• Gilsbakki- Gilhagi -Hafrafellstunga - Lundur
• Raufarhöfn - Lundur

Skólabílstjórar

Sigurður R Tryggvason: Kópasker-Lundur s: 820-4544
Kristinn Rúnar Tryggvason: Fjöll – Lundur s: 846-3835
Hafsteinn Hjálmarsson: Gilsbakki – Gilhagi – Hafrafellstunga-Lundur s: 897-2254
Stefán Leifur Rögnvaldsson: Raufarhöfn - Lundur s: 659-1433

Tímasetning skólabíla

• Frá Fjöllum og Kópaskeri kl. 7:40 alla daga
• Frá Gilsbakka 7:55 alla daga
• Frá Raufarhöfn 7:30 alla daga
• Skólabílar fara frá Lundi mánudaga til fimmtudaga kl 15:15.
• Föstudaga leggja skólabílar af stað frá Lundi kl 12:05.

Reglur í skólabílum

Samþykktar af skólaráði, bílstjórum og skólayfirvöldum.

• Sýna ber samferðafólki kurteisi og tillitsemi
• Nemendur skulu vera tilbúnir til að fara upp í skólabílinn þegar hann kemur á morgnana
• Foreldrum ber að tilkynna skólabílstjóra forföll eða breytingar með góðum fyrirvara
• Nemendur eiga alltaf að nota tiltæk öryggisbelti í skólabílnum
• Skóla- og umgengnisreglur gilda einnig í skólabílnum
• Sýna ber ítrustu aðgát þegar farið er í og úr skólabíl, einkum við götu eða þjóðveg
• Endurskinsmerki eru sjálfsagt öryggisatriði í skammdeginu

Óveður

Skólastjóri og skólabílstjórar ákveða í sameiningu hvort skóli falli niður vegna veðurs. Skólabílstjórar koma skilaboðum til skólastjóra eins fljótt og unnt er, til að hægt sé að afboða skóla sem fyrst þann dag. Ef veðurútlit er slæmt fyrir næsta dag eru foreldrar beðnir að fylgjast með bæði með veðurspá og svo skilaboðum í tölvupósti og á heimasíðu skólans að morgni dags ef afboða þarf skóla eða seinka um tiltekinn tíma. Hafa skal veðurviðvaranir Veðurstofu Íslands til hliðsjónar.
Ef um rauða veðurviðvörun er að ræða, verður ekki skólahald.  Ávallt skal öryggi nemenda í skólabílnum haft að leiðarljósi.

Leyfi, veikindi og forföll nemenda

• Veikindi nemenda eiga foreldrar/forráðamanna að tilkynna á Mentor að morgni dags og alla þá daga sem nemendur eru veikir.
• Leyfi í allt að tvo daga sækja foreldrar/forráðamenn um í Mentor. Leyfi í þrjá daga eða lengur þarf að sækja um sérstaklega til skólastjóra. Athuga þarf að ekki er hægt að skrá leyfisbeiðni í Mentor með einungis dags fyrirvara. Ef nemandi þarf leyfi með dags fyrirvara, þarf að hafa samband við skólann.
• Öll röskun á námi nemenda sem hlýst af umbeðnu leyfi er á ábyrgð foreldra/forráðamanna. sbr. 15. grein grunnskólalaga frá 2008 sem hljóðar svo: „Sæki foreldrar skólaskylds barns um tímabundna undanþágu þess frá skólasókn í einstökum námsgreinum eða að öllu leyti er skólastjóra heimilt að veita slíka undanþágu telji hann til þess gildar ástæður. Foreldrar skulu þá sjá til þess að nemandinn vinni upp það sem hann kann að missa úr námi meðan á undanþágu stendur.“
  Kennurum skólans er ekki skylt að útbúa sérstakar áætlanir eða verkefnapakka fyrir nemendur á meðan á leyfi þeirra stendur enda er nám barnsins þá á ábyrgð foreldra. Eigi nemendur ekki að fara í íþróttir eða út í frímínútur þurfa foreldrar/forráðamenn að láta kennara vita.

Skólamötuneyti

Gott og heilsusamlegt mötuneyti er í skólanum þar sem eldað er á staðnum. Undanfarið hafa matseðlar verið teknir til endurskoðunar með tilliti til næringar barna á öllum aldri og reynt að er að fara eftir því sem Landlæknisembættið setur fram í viðmiðum. Kjöt er keypt úr heimahéraði og innlent grænmeti eins og kostur er. Ef nemendur eru með fæðuofnæmi eða óþol, þurfa foreldrar að skila inn vottorði þess efnis. Grunnskólanemendur borða í matsal ásamt starfsfólki. Leikskólabörn borða á tveimur stöðum; eldri börnin af Vinakoti í matsal skólans en þau yngri inni á leikskóladeild.
Morgunmatur er borinn fram í skólanum á milli kl. 9:20 og 9:40 en leikskólabörn fá morgunmat frá kl. 8:45 – 9:05. Hádegisverður er frá kl. 12:00 – 12:30 fyrir öll börn. Ávaxtastund í grunnskóladeild er kl. 14:30 í stað ávaxta með morgunmat. Upplýsingar um matseðla má finna hér á heimasíðu skólans og í Karellen fyrir leikskóladeildina.