Öxarfjarðarskóli

Síðustu vikur hafa litast af undirbúningi árshátíðar skólans sem haldin verður í Skúlagarði föstudaginn 28.nóvember kl. 17:00. Nemendur og kennarar hafa haft í nógu að snúast við að útbúa leikmyndir, leikmuni, búninga en ekki síst æfingar á textum og lögum.

Úrslit Svakalegu lestrarkeppninnar liggja fyrir og hafnaði Öxarfjarðarskóli í 7. sæti af 20! Vel gert hjá okkar nemendum. Í gær héldum við upp á Dag íslenskrar tungu sem markar jafnframt upphafið að æfingum á vönduðum upplestri í takti við Stóru upplestrarkeppnina. Við munum síðan halda okkar eigin uppskeruhátíð á vordögum.

Svakalega lestrarkeppnin er lestrarátak fyrir 1. - 7. bekk um land allt sem stóð yfir frá 15.september til 15. október. Nemendur 1.-7.bekkja tóku þátt, skráðu skólalestur, heimalestur og frjálsan lestur og stóðu sig með miklum sóma.

Í dag tóku allir nemendur skólans þátt í Ólympíuhlaupi ÍSÍ í ljómandi hlaupaveðri. Hlaupið fór fram í sumarhúsabyggðinni neðan við Lund og nemendur stóðu sig með prýði.