Fréttir

Skólaslit Öxarfjarðarskóla voru í dag. Að venju flutti skólastjóri ávarp og voru 10. bekkingar kvaddir.  Eins voru kvaddir tveir kennarar sem nú hverfa til annarra starfa, þau Erla Dögg og Ingi Þór. Það er alltaf sama eftirsjá af öflugum og góðum nemendum og alltaf er sami söknuður í því að kveðja 10. bekkinga þegar þau halda á brott úr skólanum. En maður kemur í manns stað og er ekki til efa að núverandi 9. bekkingar verði öflugir 10. bekkingar á næsta skólaári. En það er alltaf ákveðin eftirsjá í því að sjá á eftir þessu unga og efnilega fólki úr héraðinu til framhaldsnáms.

Skólastarf í vetur gekk mjög vel. Nemendur skólans eiga hrós skilið fyrir fyrirmyndar framkomu og hegðun hvar sem þau voru sem fulltrúar okkar.

Á fimmtudag og föstudag verða 7. og 8. bekkur í skólaferðalagi. Stefnan er sett í Skagafjörð en á leiðinni mun verða farið í hvalaskoðun á Húsavík ef veður leyfir. Í Skagafirði verður meðal annars farið í klettaklifur og flúðasiglingu.

Í byrjun júní halda síðan 9. og 10. bekkur út fyrir landssteinana í skólaferðalag til Danmerkur. Það er einungis í annað skiptið (að því að umsjónarmaður best veit) sem nemendur úr Lundi fara utan í skólaferðalag. Seinast var farið til Færeyja fyrir tæpum tuttugu árum, eða 1989. Nemendur hafa verið duglegir að vera með ýmsar fjáraflanir fyrir ferðinni og eins hafa fyrirtæki á svæðinu stutt við bakið á þeim til að ferðin verði að veruleika.

Föstudaginn 11. maí kom Elvar Bragason ásamt krökkunum sem hafa verið í tónlistarsmiðju hjá honum á Húsavík. Þau héldu tónleika fyrir krakkana í félagsmiðstöðinni í Pakkhúsinum á Kópaskeri. Einnig höfðum við boðið Raufarhafnarkrökkunum að koma og vera með,

Tónleikarnir heppnuðust mjög vel og var gaman að sjá hvað krakkarnir eru orðnir flinkir. Á eftir var smá ball þar sem Reynir sá um að vera DJ. Greinilegt var að mannskapurinn var orðinn þreyttur eftir langan dag og dró fljótt af fólki, svo ballið stóð aðeins til rúmlega 22. Vonandi að flestir hafi þó skemmt sér ágætlega.

Myndir eru hér.

Þriðjudaginn 15. maí fóru nemendur og starfsfólk skólans í þjóðgarðsferð í Ásbyrgi. Nemendur unglingadeildar höfðu ásamt umsjónarkennurum sínum undirbúið dagskrá í formi pósta þar sem blandað var saman fróðleik og leikjum. Póstunum var dreift um byrgið og gengu yngri deild og miðdeild í sitt hvoru lagi á milli þeirra.

Það var sérlega gaman að sjá hvað unglingarnir stóðu sig vel í sínum hlutverkum sem leiðsögumenn og leiðbeinendur. Það var greinilegt að þau tóku hlutverk sín alvarlega og sinntu þeim að alúð.

Meðal pósta var fróðleikur um danspallinn og Ásbyrgishátíðir áður fyrr. Sagt var frá Ástarhellinum við útsýnisstaðinn, sagan um Huginn og Heiðblána var sögð við Botnstjörn og farið í ýmsa leiki.

Myndir frá ferð yngri deildar.
Myndir frá ferð miðdeildar.

Föstudaginn 11. maí fórum við í þjóðgarðinn með Fríðu Völu og dómnefnd hennar, vegna verkefnisins ,,Unglingar og lýðræði”. Þetta var seinni hluti verkefnisins en fyrri hluti þess var fólgin í ritgerðarvinnu. 

Skoða myndir úr ferðinni

Í gær kom Guðni Bragason ásamt 10 nemendum frá Húsavík og voru þau með Marimbanámskeið fyrir nemendur skólans. Allir nemendur fengu að spreyta sig á trommum og slagverki og sýndu mörg mjög góða takta. Það var gaman að sjá hvað krakkarnir náðu að læra á þessum stutta tíma.

Deginum lauk á því að allir nemendur skólans komu fram og sýndu hvað þau höfðu lært. Ánægjulegt var að sjá að nokkrir foreldrar gátu séð sér fært að koma og sjá hvað börnin höfðu verið að læra. Það hefði verið þó enn skemmtilegra að sjá fleiri. Í lokin spilaði Marimbahópurinn frá Húsavík fjögur lög fyrir okkur og var frábært að fylgjast með hversu klár þau eru.

Allir áhorfendur skemmtu sér mjög vel og við færum Guðna og Marimbahópnum hans kærar þakkir fyrir skemmtilegan dag.

Myndir eru komnar inn hér

Einnig eru komnar fleiri myndir frá handverkssýningunni á sumardaginn fyrsta. Þarr eru m.a. myndir af handverki eldri borgaranna. Sjá hér.

Í dag er Þorsteinn Hymer búinn að vera hjá okkur og hefur hann kennt nemendur unglingadeildar og miðdleildar grunnatriði í skyndihjálp.

Unglingadeildin hefur verið frá hádegi í þjóðgarðinum að leiðsegja nemendum frá Raufarhöfn um staðinn ásamt fulltrúum frá samtökunum Landsbyggðin lifir. Myndir þaðan koma inn eftir helgi. Í kvöld koma krakkar frá Húsavík sem hafa verið í tónlistarsmiðju í vetur á vegum verkefnisins Líf án áfengis. Þau ætla að spila fyrir 7.-10. bekk hjá okkur og höfum við boðið Raufarhafnarkrökkunum að koma í heimsókn og vera með.

Á fimmtudaginn í síðustu viku mætti Rannveig Snót, frá Fjöllum í Kelduhverfi, með góðar gjafir til skólans. Það voru fjórar notaðar tölvur með skjám og öllum fylgihlutum.

Heilbrigðisstofnun var að skipta út vélum hjá sér og bauð þær notuðu á góðu verði. Rannveig og Óli ákváðu að nota tækifærið og skipta sinni gömlu út. Þeim datt í hug að skólanum gætu nýst svona vélar, en um er að ræða pakka frá Hewlett-Packard sem samanstendur af tölvu, 17" flatskjá, bleksprautuprentara, lylkaborði og mús.

Rannveig fór á stúfana og fékk fyrirtæki á svæðinu til að leggja saman í þrjá pakka handa skólanum og svo gáfu hún og Óli gömlu vélina sína með, ásamt öllu sem henni fylgdi.

Þau fyrirtæki sem gáfu vélarnar voru:
Fjallalamb, Kópaskeri
Sparisjóður Þórshafnar og nágrennis, Kópaskeri
Silfurstjarnan, Öxarfirði
Verkalýðsfélag Húsavíkur og nágrennis, Húsavík

Það er alltaf gaman að fá góðar gjafir og gott að finna hlýhug samsveitunga í garð skólans. Þessar tölvur munu koma að góðu gagni við kennslu og störf nemenda.

Við þökkum kærlega fyrir okkur.