Fréttir

Í kvöld, þriðjudag 28. apríl, munu nemendur 9. og 10. bekkjar standa fyrir félagsvist í skólanum á Kópaskeri.
Byrjað verður að spila kl. 19:30 og er þátttökugjald 500 kr.
Sjoppa verður á staðnum þar sem hægt verður að kaupa kaffi, gos og sælgæti í hléi.

Ágóði rennur í ferðasjóð vegna fyrirhugaðar Danmerkurferðar í vor.

Vinningar eru í boði Símans.

Vonumst til að sjá sem flesta til að eiga saman skemmtilega kvöldstund.

Á miðvikudaginn, 22. apríl, var síðasta fimleikaæfing vetrarins. Aðalsteinn Örn á Víkingavatni hefur haldið utan um þessar æfingar í vetur. Þennan seinasta dag var foreldrum og öðrum sem vildu boðið að koma og horfa á og taka þátt í ýmsum æfingum með börnunum.

Hér er hægt að skoða myndir sem Fljóða tók.

Á morgun, sumardaginn fyrsta, er frídagur í skólanum.
Við viljum minna á að í skólahúsinu á Kópaskeri verður dagskrá með líku sniði og hefð hefur komist á undanfarin ár. Þar verður sameiginleg handverkssýning nemenda grunnskólanna, eldri borgara og kvenfélagsins Stjörnunnar. Einnig verður tónlistarskólinn með sína vortónleika.
Nemendur 9. og 10. bekkjar verða með vöfflukaffi til fjáröflunar fyrir Danmerkurferð í vor.
Hvetjum alla sem geta til að mæta og sjá það glæsilega handverk sem er verið að vinna hér á svæðinu, hlýða á tónlist og fá sér smá sumarkaffi.

Hér er hægt að sjá myndir frá deginum í fyrra.

Stóra upplestrarkeppnin var haldin á Raufarhöfn í gær, eftir að hafa verið frestað í mars vegna veðurs. Þar mættu nemendur skólanna í norður sýslunni og reyndu með sér í upplestri.
Frá Öxarfjarðarskóla fóru þrír þátttakendur, þau Björg Dúa Guðmundsdóttir, Nareerat Kanram og Snæþór Aðalsteinsson. Að auki fóru þær systur frá Fjöllum; María Dís sem kynnti milli atriða og Þórdís Alda sem lék nokkur lög á þverflautu.
Undanfarin ár hafa nemendur af skólasvæðinu við Öxarfjörð verið í einhverjum af þremur efstu sætunum og sú varð raunin þetta árið líka.
Í fyrst sæti lenti Rósa Björg frá Grunnskólanum á Raufarhöfn, í öðru sæti lenti Snæþór Aðalsteinsson úr Öxarfjarðarskóla og í þriðja sæti lenti Rögnvaldur Viðar Friðgeirsson úr Kópaskersskóla. Við óskum þeim og öðrum þeim sem komu fram til hamingju með glæsilega frammistöðu.

Myndir frá keppninni er hægt að sjá hér en þær tók Guðrún S. K.

5.-7. bekkur flytja Þrymskviðu (Hamarsheimt)

500 kr fyrir börn á grunnskólaaldri

Kaffihlaðborð er innifalið í aðgangseyri

9. og 10. bekkur munu halda félagsvist til söfnunar upp í fyrirhugaða Danmerkurferð þeirra.
Spilað verður í Skúlagarði í Kelduhverfi fimmtudagskvöldið 19. mars kl 19:30.
Veglegir vinningar í boði eftirtalinna fyrirtækja:.
Hvetjum alla sem eiga heimangengt og hafa gaman af að grípa í spil til að mæta.

Krakkar af skólasvæðinu við Öxarfjörð gengu í fyrirtæki á Kópaskeri og sungu. Einnig var komið við í Silfurstjörnunni á leiðinni á Kópasker. Þótt veðrið væri ekki spennandi mátti sjá furðuverur á öllum aldri, allt frá tveimur elstu árgöngum leikskóla upp í elstu nemendur grunnskóla, vaða snjóinn á milli fyrirtækja. Þegar búið var að fylla nammipokana lá leiðin í Pakkhúsið þar sem kötturinn var sleginn úr tunnunni og dansað og leikið sér. Dagurinn heppnaðist vel og var einstaklega gaman að sjá einlæga ánægju og áhuga yngstu barnanna.
Myndir úr Pakkhúsinu.

Nú heilsar fréttabréf nr. 2 á þessu ári og kominn tími til!

 

Ýmislegt hefur á daga okkar drifið að undanförnu og ætlum við að gera því nokkur skil í hér að neðan

9. og 10. bekkur stóðu fyrir rjómabollu- og blómasölu í tilefni bolludags og konudags til að safna upp í fyrirhugaða Danmerkurferð. Síðast liðinn föstudag voru þau með bollukaffi hjá Ísak í Ásbyrgi og buðu fólki að kaupa blómvendi.
Á laugardaginn var svo gengið í hús með blóm á Kópaskeri og voru viðtökurnar svo góðar að allir blómvendirnir kláruðust í þorpinu nema einn sem fór í Hjarðarási. Við áttum alls ekki von á að þessir 40 vendir sem við fengum á góðu verði frá Kristínu og Sam seldust svona hratt og vel. Við verðum að biðja þá afsökunar sem bjuggust við heimsókn frá blómasölufólki en fengu ekki. Vonandi að enginn hafir lent í vandræðum vegna þess...
Í gær, bolludag, var svo bollukaffi í Bakka á Kópaskeri.

Við viljum koma á framfæri kærum þökkum til þeirra sem styrkt hafa ferðina með einum eða öðrum hætti og tekið krökkunum vel í þeirra fjáröflunum. Sérstakar þakkir fá Ísak og Kristbjörg og Óli fyrir aðstöðu og lipurð við kaffisölur krakkanna.

Það er ljóst að þessi ferð kemur til með að verða dýrari en sú sem farin var fyrir tveimur árum. Það er því ljóst að enn vantar nokkuð upp á til að hafa upp í kostnað og þannig gera öllum nemendum 9. og 10. bekkjar fært að fara með nú á tímum efnahagsþrenginga. Það er því ánægjulegt að fólk í samfélaginu okkar skuli vilja leggja krökkunum lið.

Kærar þakkir.