Fréttir

Fyrirtækið 66°Norður efndi á haustdögum til myndbandasamkeppni meðal grunnskólanema. Hugmyndin að keppninni kom frá Sigurjóni Sighvatssyni, kvikmyndagerðarmanni og eiganda fyrirtækisins. Keppt var í tveimur flokkum, 1.-7. bekk og 8. -10 bekk. Í dómnefnd eru Þorgerður Katrín Gunnarsdóttir, menntamálaráðherra, Baltasar Kormákur Samper, leikstjóri, Þórir Sigurjónsson, kvikmyndargerðarmaður og Helga Viðarsdóttir, markaðsstjóri 66°Norður. Einnig fer fram kosning á netinu og verður niðurstaða hennar tekinn inn í mat dómnefndar.

Verðlaun eru ekki af verri endanum. Skóli sigurvegara fær myndbandsupptökuvél, auk þess sem vinningshafarnir fá fatnað frá 66°Norður að andvirði 150.000 kr í verðlaun.

Fjórar stúlkur úr skólanum sendu myndband inn í keppnina. Það voru þær Freydís Rósa, Margrét Sylvía, María Dís og Sylvía Dröfn. Myndbandið þeirra er mjög gott og ætlum við því að sjálfsögðu sigur. Við hvetjum alla til að fara inn á vef 66°Norður og skoða myndband stelpnanna og gefa því atkvæði. Það er númer 9 í röðinni hjá eldri flokknum.

Smellið hér til að fara beint inn á myndband stelpnanna.

Í morgun spiluðu Guitar Islancio á frábærum tónleikum, fyrir nemendur og starfsfólk Öxarfjarðarskóla og Kópaskersskóla.  Koma þeirra hingað er liður í verkefninu Tónlist fyrír alla. Tónlist fyrir alla er samstarfsverkefni á vegum ríkis og sveitarfélaga sem hefur staðið yfir í meira en 15 ár. Tilgangur verkefnisins er að kynna íslenskum grunnskólabörnum ólíkar tegundir tónlistar sem þau njóta í flutningi frábærra íslenskra tónlistarmanna.

Tónleikarnir stóðu yfir í um 45 mínútur og voru tónlistarmennirnir líflegir og skemmtilegir og héldu áhorfendum við efnið allan tímann. Þeir fluttu að mestu íslensk þjóðlög í eigin útsetningu auk laga eftir Gunnar Þórðarson. Það var mjög gaman þegar þeir fengu áhorfendur til að syngja með í nokkrum lögum. Dagskráin var mjög skemmtileg hjá þeim og var ekki annað að heyra en almenn ánægja hafi verið með tónleikana, bæði hjá ungum sem öldnum. Að minnsta kosti hrósaði hljómsveitin áheyrendum nokkrum sinnum og sögðu að þau væru greinilega tónleikavön.

Guitar Islancio skipa þeir Gunnar Þórðarson gítarleikari, Björn Thoroddsen gítarleikari og Jón Rafnsson sem spilaði á kontrabassa. Þetta eru tónlistarmenn í fremstu röð og hvetjum við alla sem eiga þess kost að fara og sjá þá spila í kvöld á Raufarhöfn.

Myndir frá tónleikunum eru hér.

Okkur langar að minna á foreldrafræðsluna á vegum Fjölskylduþjónustu Norðurþings annað kvöld í Lundi kl. 20-22.
Fræðsluerindi verða tvö á hverju stigi og gert ráð fyrir að hvert taki 60 mín og fundirnir standa því rúmlega tvo klukkutíma í þremur stofum.

Dagskráin er sem hér segir:

Yngsta stig:
Vinnuvist barna - hvað geta foreldrar gert?- Erla Alfreðsdóttir iðjuþjálfi

Samskipti heimila og skóla - Þórhildur Sigurðardóttir sérkennsluráðgjafi

Athugið að foreldrar leikskólabarna eru velkomnir á þennan fund!

Miðstig:
Um samskipti - einelti - Þórhildur Sigurðardóttir sérkennsluráðgjafi

Tölvu-og netnotkun barna- Þorgrímur Sigmundsson ráðgjafi

Unglingastig:
Áhrif umhverfisins og neysla - Arnfríður Kjartansdóttir sálfræðingur

Réttindi og skyldur - Ágúst Óskarsson ráðgjafi

Vonandi sjá sem flestir sér fært að mæta!


Starfsdagur kennara verður næstkomandi mánudag 20. október og verður enginn skóli þann dag.

Í næstu viku verða foreldrasamtöl og munu umsjónarkennarar senda upplýsingar heim með nemendum varðandi þau.

Bestu kveðjur frá Öxarfjarðarskóla,

f.h. starfsfólks,
Hrund

Í dag 10. október er alþjóðlegi geðheilbrigðisdagurinn. Að þessu sinni er megináherslan á geðheilbrigði barna og unglinga.
Samfés er einn af samstarfsaðilum sem koma að deginum og voru umræður um þau mál á landsmótinu um síðustu helgi.

Bendi á tvær síður varðandi daginn.
Heimasíða geðheilbrigðisdagsins, www.10okt.com og
fræðsluvefur um geðheilsu barna; www.umhuga.is

Um síðustu helgi var haldið Landsmót á vegum Samfés fyrir unglingaráðin í félagsmiðstöðvum landsins. Við fórum þrír umsjónarmenn með 16 krakka úr félagsmiðstöðvunum þremur sem reknar eru af sveitafélaginu. Ferðin heppnaðist mjög vel og voru krakkarnir sjálfum sér og sveitarfélaginu til mikils sóma. Það er ekki erfitt að vera umsjónarmaður með svona þægilegum hópi.

Nú er fjórða vikan senn á enda og ýmislegt hefur verið starfað í skólanum. Flutningar eru að hefjast hjá kennurum yfir í betra rými, þar sem við höfum nú fengið íbúðina fyrir vinnuaðstöðu. Þá munu unglingar fá eigið herbergi til afnota þar sem kennarastofan var.

Matseðil mötuneytis fyrir næstu fimm vikur er nú hægt að finna í valmyndinni hér til vinstri, undir Mötuneyti. Framvegis munu matseðlar verða birtir þar jafnóðum og þeir eru tilbúnir hjá matráði.

Í gær var haldinn fundur með foreldrum og starfsfólki í Öxarfjarðarskóla. Þetta var góður fundur og ánægjulegt að sjá hve margir foreldrar sáu sér fært að mæta. Ýmislegt var á dagskrá og margt rætt, en þetta var kærkomið tækifæri fyrir foreldra að spyrja út í starfið hjá okkur í vetur. Nýtt starfsfólk var kynnt og einnig þær breytingar og hugmyndir sem upp hafa komið varðandi heildstæðan skóla sem farið verður af stað með í byrjun október.

Samkvæmt nýjum grunnskólalögum eru foreldra- og kennararáð lögð niður, en í þeirra stað á að stofna skólaráð og var gengið frá því á fundinum. Það verður komið nánar að því hér neðar.

Einnig þurfti að stofna nýtt foreldrafélag þar sem skólarnir hér eru orðnar aðskildar stofnanir. Ákveðið var að hafa svipað fyrirkomulag og byrjað var með í fyrra, að í 5 manna stjórn yrðu fulltrúar fyrir hvert stig skólans, einn fyrir leikskólastig, einn fyrir yngsta stig, einn fyrir miðstig og tveir fyrir unglingastig, þ.e. einn fyrir 8. og 9. bekk og einn frá foreldrum 10. bekkinga. Nöfn fulltrúanna verða birt hér á síðunni um leið og allir sem tilnefndir voru hafa gefið samþykki sitt fyrir setu í stjórninni.

Erla Óskars reiddi fram dýrindis veitingar í hléi en að því loknu bauðst foreldrum að hitta kennara í þeirra stofum til frekara spjalls.

Var ekki annað að sjá en almenn ánægja væri meðal foreldra og starfsfólks með fundinn og er athugandi að gefa foreldrum oftar færi á að hittast sem hópur með umsjónarkennurum sinna barna.

Skólaráð

Samkvæmt nýjum grunnskólalögum hefur foreldra- og kennararáð verið lagt niður en í stað þess skal kosið Skólaráð við alla skóla.
Í grunnskólalögunum segir m.a.
“Við grunnskóla skal starfa skólaráð sem er samráðsvettvangur skólastjóra og skólasamfélags um skólahald. Skólaráð tekur þátt í stefnumörkun fyrir skólann og mótun sérkenna hans. Skólaráð fjallar um skólanámskrá skólans, árlega starfsáætlun, rekstraráætlun og aðrar áætlanir um skólastarfið.
Skólaráð skal fá til umsagnar áætlanir um fyrirhugaðar meiri háttar breytingar á skólahaldi og starfsemi skóla áður en endanleg ákvörðun um þær er tekin. Skólaráð fylgist almennt með öryggi, aðbúnaði og almennri velferð nemenda. Skólanefnd, sbr. 6. gr., getur með samþykki sveitarstjórnar falið skólaráðum einstakra skóla ákveðin verkefni þessu til viðbótar.
Skólaráð skal skipað níu einstaklingum til tveggja ára í senn, tveimur fulltrúum kennara ásamt einum fulltrúa annars starfsfólks í viðkomandi skóla, tveimur fulltrúum nemenda og tveimur fulltrúum foreldra, auk skólastjóra sem stýrir starfi skólaráðs og ber ábyrgð á stofnun þess. Skólaráð velur að auki einn fulltrúa grenndarsamfélags til að sitja í ráðinu eða viðbótarfulltrúa úr hópi foreldra. Auk þess skal skólastjóri boða til sameiginlegs fundar skólaráðs og stjórnar nemendafélags að lágmarki einu sinni á ári.” Fulltrúar nemenda skulu eiga kost á að taka þátt í umræðum skólaráðs þegar fjallað er um velferðar- og hagsmunamál nemenda.

Í skólaráði eru:
Guðrún Sigríður Kristjánsdóttir, skólastjóri
Hrund Ásgeirsdóttir, kennari og staðgengill skólastjóra
Guðrún Margrét Einarsdóttir, sérkennari
Elisabeth Hauge, deildarstjóri leikskóla
Ágústa Ágústsdóttir, Garði Kelduhverfi
Geir Bjarnason, Kópaskeri
Guðríður Baldvinsdóttir, Lóni Kelduhverfi

Við boðum til fundar næstkomandi þriðjudagskvöld 9. ágúst í Lundi kl. 20:00. 

Aðalumræðuefnið verður skólastarfið í vetur og kynning á heildstæðu skólastarfi.

Stofna þarf nýtt foreldrafélag og vegna breytinga á grunnskólalögum er foreldraráð og kennararáð lagt niður en þess í stað stofnað skólaráð sem nánar verður kynnt á fundinum.

Vonum að allir sjái sér fært að mæta og spjalla yfir kaffibolla um vetrarstarfið og eiga góða kvöldstund með okkur. 

Kærar kveðjur,

Guðrún S. Kristjánsdóttir og
Hrund Ásgeirsdóttir