Fréttir

Nemendum okkar í 10.bekk bauðst að fara með jafnöldrum sínum úr Borgarhólsskóla í gönguferð úr Vesturdal í Ásbyrgi. Við þáðum það að sjálfsögðu með þökkum og fóru allir nemendur ásamt Guðrúnu, Hrund og Kidda með í gönguna.
Það voru ekki allir nemendur 10. bekkjar á Húsavík sem gengu með. Sumir fóru styttri hring um Vesturdal og aðrir unnu að verkefnum á Húsavík. En það var hress og duglegur hópur sem gekk þessa 12 km leið.
Sigrún, náttúrufræðikennari á Húsavík, var fararstjóri í ferðinni og var með fræðslu á leiðinni.
Veðrið lék við göngumenn, sól og hlýtt en samt vindur til kælingar.

Hér eru myndir úr ferðinni.

Öxarfjarðarskóli var settur formlega síðast liðinn mánudaginn klukkan 18. Guðrún skólastjóri hélt smá ræðu þar sem hún kynnti í stuttu máli fyrirhugað starf  vetrarins og kynnti það starfsfólk sem verrður við skólann í vetur. Það hefur fjölgað í starfsmannahópnum þar sem nemendum hefur fjölgað við sameiningu skólanna. Starfið fer vel af stað og leggst veturinn ágætlega í mannskapinn.

Í morgun mætti starfsfólk til vinnu til að undirbúa skólastarf vetrarins. Hótelrekstri er að ljúka og flestar stofur að tæmast af beddum. Þessa viku verður unnið að því að gera húsið klárt, ásamt því að kennarar undirbúa að taka á móti sínum nemendum. Á fimmtudag verður árlegur þingdagur skólanna á skólaþjónustusvæðinu á Hafralæk og á föstudag er þingdagur BKNE.

Að þessu sinni verður skóli ekki boðaður með heimsóknum, heldur verður skólinn settur næst komandi mánudag, 24. ágúst klukkan 18:00. Að lokinni setningu munu umsjónarkennarar taka á móti sínum umsjónarnemendum og foreldrum í stutt spjall.

Kennsla hefst á hefðbundnum tíma þriðjudaginn 25. ágúst klukkan 8:20. Skólabílar leggja af stað klukkan 7:45 frá Kópaskeri og Fjöllum.

Hér að neðan eru tenglar á innkaupalista fyrir nemendur og skóladagatal.
Innkaupalisti 1.-3. bekkjar
Innkaupalisti 4.-7. bekkjar
Innkaupalisti 8.-10. bekkjar
Skóladagatal

Nú er nýlokið skólaferðalagi 9. og 10. bekkjar til Danmerkur.
Flogið var út um miðjan dag þann 8. júní og lent í Danmörku rétt fyrir kl 20 að dönskum tíma.
Fyrsta kvöldið borðuðum við sameiginlega með Raufarhafnarskóla á pizzastað við Strikið en þau fóru út með sömu vél og við.
Næstu dagar fóru í skoðunarferðir um Kaupmannahöfn og Tívolíferð en á miðvikudagsmorgun fórum við í heimsókn til vinabekkjar í Hedegårdskolen í Ballerup.
Við vorum að mestu heppinn með veður. Það var ekki mikil sól en við sluppum að mestu við rigningu nema eftir hádegi á fimmtudegi. Þá lentum við í þvílíku úrhelli að við aflýstum frekari skoðunarferðum þann daginn og fórum því ekkert að skoða fornar Íslendingaslóðir. Í staðinn var stefnan sett í menningarreisu í verslunarmiðstöðina Fields. Það rigndi svo látlaust það sem eftir var dags og fram á nótt. Nokkrir úr hópnum létu það þó ekki aftra sér frá því að skella sér í fótbolta út í rigninguna um kvöldið, enda mátti halda að þeir hefðu skellt sér í sundsprett í einhverjum pollinum í kring þegar þeir komu inn.
Föstudagsmorgun var síðan haldið beint út á flugvöll og flogið heim. Nemendur voru sér og skóla sínum til sóma eins og ávallt og var það þreyttur en ánægður hópur nemenda og kennara sem komu heim.

Smellið á einhvern tenglanna hér að neðan til ða skoða myndir úr ferðinni.

Dagur 1
Dagur 2
Dagur 3
Dagur 4

7. og 8. bekkur skólans fór ásamt 7, bekk Kópaskersskóla í skólaferðalag þann 3. og 4. júní.  Bílstjóri og fararstjóri var Rúnar Óskarsson og stóð hann sig að venju frábærlega. Honum til aðstoðar voru Kiddi, Maggi og Ingibjörg, auk þess sem Jóhanna Margrét kom með sem okkar sérlegur aðstoðarmaður og var yndislegt að hafa hana með.

Við byrjuðum á að skoða Æðarfossa við ósa Laxár. Höfðu færst okkar nokkru sinni komið þar áður og var gaman að sjá þetta fallega umhverfi. Næst fórum við í Iðnaðarsafnið á Akureyri. Það var gaman að sjá hversu mikið af allskonar vörum voru framleiddar á Íslandi, og þá sérstaklega Akureyri, hér áður fyrr. Þetta er eitthvað sem við þurfum að gera aftur núna í kreppunni. Eftir Iðnaðarsafnið var haldið í Kjarnaskóg þar sem nesti var snætt og nokkurri stund eytt í leiktækjum í góða veðrinu. Því næst var haldið í Akureyrarlaug í sund. Stefnan var svo tekin á Bakkaflöt í Skagafirði þar sem við gistum í góðu yfirlæti og var boðið upp á dýrindis pizzahlaðborð um kvöldið.

Á fimmtudeginum var dagurinn tekinn snemma, ræs kl 8 og farið í siglingu á Jökulsá Vestari. Eftir skemmtilega siglingu í góðu veðri var farið í pottana á Bakkaflöt til að ylja sig upp en síðan var haldið á Akureyri í keilu og bíó.

Það var ekki að sjá annað en að krakkarnir hefðu skemmt sér vel saman og verið ánægð með ferðina. Því miður gleymdi vefstjóri myndavélinni heima en hér að neðan eru tenglar á myndirnar sem Maggi tók.

Dagur 1 - Dagur 2

Á morgun, 3. júní fara 7. og 8. bekkur í skólaferðalag. Farið verður til Akureyrar og í Skagafjörð í gúmbátasiglingu.

Nú er farið að styttast í Danmerkurferð 9. og 10. bekkjar. Það verður flogið út nk mánudag 8. júní. Fjáröflun fyrir ferðina hefur gengið vonum framar og hefur safnast fyrir nær öllum fyrirséðum kostnaði.
 
Kvenfélögin þrjú við Öxarfjörð styrktu ferðina um 30.000 kr hvert. Við viljum þakka þeim kærlega fyrir það.

Eins viljum við koma á framfæri þökkum til allra þeirra sem lögðu krökkunum lið í söfnuninni í vetur og ekki síður þeim sem gert hafa ferðina mögulega með því að leggja pening í hana. Dúddi fær sérstakar þakkir fyrir rausnarlegt framlag.

Enn eiga einhverjir eftir að borga, bæði klósettpappír og í kleinu- og snúðasölu. Það væri afskaplega gott að viðkomandi gætu lagt inn sem allra fyrst, í síðasta lagi fyrir helgi.

Reikningsnúmer Danmerkursjóðs
567-14-400125
260469-5689

Öxarfjarðarskóla var slitið í kvöld. Nemendur úr yngstu deild spiluðu á blokkflautur, en þau hafa öll verið í vikulegum blokkflaututímum hjá Birni Leifssyni í vetur. Guðrún skólastjóri fór með smá ræðu þar sem hún rakti meðal annars það helsta úr skólastarfi vetrarins. Síðan voru 10. bekkingar útskrifaðir og þeim afhent einkunnablöð sín og rós. Að því loknu hittu nemendur umsjónarkennara sína í stofum þar sem allir hinir fengu sín vitnisburðarblöð. Að lokum var boðið upp á kaffi og meðlæti í mötuneytinu.

Starfólk skólans þakkar nemendum, foreldrum og öðrum velunnurum skólans kærlega fyrir ánægjulegt samstarf í vetur og óskar öllum góðs sumars.

Skoða myndir

Öxarfjarðarskóla verður slitið föstudaginn 15. maí kl 18:00. Þar verður 10. bekkur útskrifaður og kvaddur samkvæmt venju.
Umsjónarkennarar munu hitta sína nemendur og afhenda námsmat.
Boðið verður upp á kaffiveitingar í lokin.

Bói hefur verið duglegur að taka myndir af þeim gripum sem nemendur hafa smíðað hjá honum í vetur. 1.-8. bekkur hafa verið í föstum tímum í smíðum í vetur en 9. 0g 10. bekkur hafa haft smíðar sem valfag. Margir stórglæsilegir gripir hafa orðið til og er virkilega gaman að skoða þá.

Myndirnar er hægt að skoða hér

Nemendur 9. og 10. bekkjar héldu félagsvist í gær, þriðjudag á Kópaskeri. Áður höfðu þau haldið félagsvist í Skúlagarði þann 19. mars.

Það er ánægjulegt hvað nágrannar okkar af Tjörnesinu voru dulgegir að mæta á bæði spilakvöldin og kunnum við þeim miklar þakkir fyrir það.

Í Skúlagarði var spilað á níu borðum og á Kópaskeri var spilað á sjö borðum. Það hefði verið gaman að sjá meira af heimafólki á spilakvöldinu í gær en Tjörnesingar og vegavinnufólk björguðu því að það tókst að fylla sjö borð.

Myndir frá félagsvist í Skúlagarði og á Kópaskeri.