Fréttir

Í dag var tekið smá forskot á jólastemninguna hér í skólanum. Sú skemmtilega hefð hefur skapast hér síðustu árin að halda upp á Lúsíudaginn að sænskum sið. Það var með Önnu Englund og hennar börnum sem þessi venja komst á hér. Það var hún Lotta Englund sem hafði veg og vanda að Lúsíuhátíðinni þetta árið ásamt áhugasömum nemendum, en Bryndís Edda var sjálf Lúsía.

Eftir morgunmat komu allir saman í gryfju og sungu 5-6 jólalög undir harmoníkuundirleik Björns Leifssonar en á meðan undirbjó Lotta Lúsíuhópinn. Hópurinn kom svo fram og söng hefðbundin Lúsíulög og útdeildu saffranbrauðum.

Eftir hádegi var svo föndurstund hjá okkur. Það voru nokkrar föndurstöðvar sem nemendur gátu farið á milli, jólakortagerð, kransagerð, ullarþæfing og kertagerð. Foreldrar og aðrir ættingjar voru velkomnir eins og áður og voru nokkrir sem nýttu sér að koma og eiga föndurstund með börnunum.

Myndir frá deginum

Upplýsingar um Lúsíuhátíðina af jólavefnum

Smá fróðleikur og textar á sænsku, norsku og dönsku af vef Norræna félagsins

Við viljum minna á haustgleði nemenda sem halda á fimmtudaginn 28. október.

Glæsilegur matur og skemmtiatriði.

Pantanir í síma 4652244 til kl 12 föstudaginn 22. okt. eða á netfangið lundur@kopasker.is

17 ára og eldri 2500kr
Börn á grunnskólaaldri 1000 kr
Frítt fyrir börn yngri en 6 ára

Í sumar og haust hefur verið unnið að endurbbótum á aðstöðu leikskóladeildar í Lundi. Byggt var andyri við innganginn og handmenntastofa færð svo nú er leikskólinn í tveimur aðliggjandi stofum sem innangengt er á milli. Nýtt salerni var sett upp í eldri aðstöðu leikskólans og gluggi settur á milli stofa. Í andyri er nú aðstaða til að geyma vagna og þar er einnig þurrkskápur svo hægt sé að þurrka blaut föt.

Langþráð girðing er nú komin utan við leikskólann svo nú er sleppa yngstu börnum lausum án þess að eiga á hættu að týna þeim út í skóg. Innan þessarar girðingar er sandkassi og önnur leikaðstaða.

Myndir frá leikskóla

Þriðjudaginn 29.september tóku nemendur Öxarfjarðarskóla þátt í Norrænaskólahlaupinu. Í boði voru þrjár vegalengdir, 2,5km, 5km og 10km. Voru það 41 nemandi úr grunnskólanum og 2 úr leikskólanum sem tóku þátt. Krakkarnir fengu hið besta veður til að hlaupa í og stóðu sig með prýði. Krakkarnir hlupu í heildina 172,5 km eða rúmlega vegalengdin héðan úr Lundi og inn á Akureyri.

ÞH

Myndir frá skólahlaupinu

Um miðjan september sl. heimsótti bréfdúfa okkur hingað í skólann. Hún hélt lengi til á svölunum utan vð kennarastofuna og var hin spakasta þótt spígsporað væri í kringum hana og teknar af henni myndir. Hún var afar virðuleg og snyrti sig milli þess sem hún hvíldist.

Myndirnar er hægt að skoða hér.

Skólastarfið gengur enn vel þrátt fyrir fjarveru Guðrúnar skólastjóra.

Veðrið hefur leikið við okkur undanfarna daga og hafa nemendur verið duglegir að fara út og njóta náttúrunnar. Það eru viss forréttindi að þurfa ekki annað en að ganga fyrir húshornið til að komast í ber í frímínútum og eru börnin að skila sér inn berjablá og sum jafnvel með ber í dollu. Steini og Conny hafa nýtt góða veðrið til útiveru í íþróttatímunum og þau hafa verið með sundkennslu á mánudögum sem mun standa eitthvað fram á haustið.

Kolla verður hjá okkur í afleysingum fram eftir hausti. Henni er víkingatíminn hugleikinn og hefur hún verið að lesa Hrafnkels sögu með 8. og 9. bekk og á miðstigi hefur hún verið að kynna þennan forna menningararf við mikinn áhuga nemenda.

Öxarfjarðarskóli hefur gerst aðili að þróunarverkefni ásamt þremur nágrannaskólum sem unnið er í samstarfi við Háskólann á Akureyri. Hinir skólarnir eru Grunnskólinn á Raufarhöfn, Borgarhólsskóli og Hafralækjarskóli. Þetta verkefni er til  tveggja ára og kallast  Byrjendalæsi. Þetta er spennandi verkefni sem Ann-Charlotte, Gunna Magga og Vigdís taka þátt í fyrir hönd skólans.

Lengd viðvera hefst í næstu viku, þriðjudaginn 14. september. Skólabílar fara þá frá Lundi kl. 16 á þriðjudögum til fimmtudögum en á hefðbundnum tíma á mánudögum og föstudögum (14:40 og 12:00).

Við viljum minna á að æskilegt er að nemendur frá fjórða bekk og upp úr séu með innanhússkó fyrir íþróttatíma til að forðast meiðsli.

Við stefnum á að halda almennan foreldrafund mánudaginn 20. september. Fundurinn verður nánar auglýstur síðar.

Að lokum er hér hlekkur á nokkrar myndir frá starfinu það sem af er skólaárinu.

Skólastarf hefur farið afar vel af stað og er ánægjulegt hvað nemendur mæta glaðir og jákvæðir til leiks. Það er góður andi í hópnum og starfsfólk er ánægt með hversu vel hefur gengið þessa fyrstu daga.

Matseðill sem gildir út september er kominn á netið og er hægt að finna hann með því að smella á Mötuneyti hér til vinstri á síðunni og velja þar matseðla í felliglugga sem opnast. Síðan er smellt á tengilinn sem birtist í aðalglugga og þá verður hægt að hlaða niður eða opna Word-skjal með viðkomandi matseðli. Þarna munu matseðlar vetrarins birtast jafnóðum og þeir verða tilbúnir.
Einnig er hægt að opna matseðilinn beint hér.

Gjaldskrá leikskóla er einnig kominn á vefinn fyrir þetta skólaár. Hana má finna undir tengli leikskóla hér til vinstri eða með því að smella hér.

Nú er nýlokið stórkostlegri árshátið skólans þar sem nemendur fóru á kostum.

Nemendur í 1. til 3. bekk ásamt elstu leikskólabörnum sungu tvö lög og dönsuðu Michael Jackson dans ásamt Önnu Karen og Sylvíu Dröfn sem jafnframt sömdu dansinn. Þau voru dásamleg á sviðinu og aðdáunarvert hvað þau voru róleg þegar tæknin var að stríða okkur en Jackson lagið vildi ekki spilast alminnilega fyrr en í þriðja tækin sem ver prófað. Á meðan biðu þau sallaróleg og yfirveguð á sviðinu. Þegar lagið komst loks af stað sýndu þau mikil tilþrif og voru flottt í dansinum.

4. til 7. bekkur sýndu atriði sem sett var saman utan um kvæði Stefán Jónssonar sem flestir þekkja en þau eru m.a. Guttavísur og Ranga gamla í hænsnakofanum. Þau sungu kvæðin við undirleik Björns Leifsonar á milli þess að leika stutta leikþætti í kringum þau. Krakkarnir stóðu sig allir mjög vel og var gaman að sjá þessar gamalkunnu vísur í lifandi búningi.

Nemendur unglingadeildar sýndu söngleikinn Hárið. Eftir mikla og oft erfiða vinnu við æfingar skiluðu þau sínu með miklum sóma. Þetta erfiða og krefjandi verk með mörgum löngum einræðum, miklum samtölum, söng og dansi var sýnt með slíkum sóma að krakkarnir geta verið stoltir af. Þarna unnust margir persónulegir sigrar og leikgleðin var allsráðandi.

Við viljum minna á að við ætlum að vera með aukasýningu á Hárinu á morgun, 26. mars, klukkan 20:00 í Skúlagarði. Við hvetjum þá sem áhuga hafa til að láta þessa frábæru sýningu ekki fara fram hjá sér.


Myndir verða settar inn fljótlega.