Fréttir

Í morgun voru tónleikar fyrir nemendur og starfsfólk Öxarfjarðarskóla. Málmblásarakvintett Sinfóníuhljómsveitar Norðurlands komu og spiluðu í skólahúsinu á Kópaskeri. Hljóðfæraskipan var þannig að það voru tveir trompettleikarar, básunuleikari, túbuleikari og hornaleikari. Hljóðfæraleikararnir kynntu hljóðfæri sín á milli laga og léku lag á eftir þar sem viðkomandi hljóðfæri var áberandi. Það var mjög gaman að fá svona færa hljóðfæraleikara í heimsókn og voru áhorfendur hrifnir.

Hljóðfæraleikararnir þökkuðu fyrir sig og höfðu á orði hversu gaman væri að spila fyrir svona góða áhorfendur. Þeim þótti ástæða til að ítreka það áður en þeir yfirgáfu húsið að þeir fengju ekki alltaf svona góða áhorfendur á skólatónleikum. Þetta sýnir enn einu sinni hvað við eigum frábær börn hér á svæðinu.

Sjá myndir frá tónleikunum

Á föstudaginn sl. var haldin undankeppni fyrir söngkeppni Samfés á Húsavík. Þarna mættu unglingar úr 18 félagsmiðstöðvum af Norðurlandi til að keppa um hvaða fimm atriði kæmust í aðalkeppnina sem haldin verður í Reykjavík þann 8. mars. Alls voru nálægt 600 manns í íþróttahúsinum á Húsavík þetta kvöld.

Krakkarnir frá félagsmiðstöðvunum voru að tínast smátt og smátt í bæinn fram eftir degi. Við úr Beisinu vorum ásamt Raufarhafnarkrökkunum þau fyrstu á staðinn. Eftir smá afslöppun á efri hæðinni í íþróttahöllinni röltum við á Sölku þar sem allir fengu að borða. Eftir það var frjáls tími fyrir alla nema keppendur en okkar strákar áttu æfingu kl. 15:10. Það dróst um hátt á klukkutíma að þeir gætu byrjað en á meðan voru krakkarnir ýmist í sundi, á búðarrápi, í höllinni eða í Keldunni. Eftir því sem leið á daginn og félagsmiðstöðvum á svæðinu fjölgaði fór að þrengjast um í Keldunni og fór þá fólk að tínast inn í höllina.

Eitthvað seinkaði byrjun keppninnar þar sem dagskrá dagsins hafði riðlast og að auki var ein rútan sem flutti Akureyringa í einhverju bileríi svo þeim seinkaði um rúman klukkutíma.

Keppnin hófst svo loks og það var greinilegt að krakkarnir voru komnir til að skemmta sér, því það var mikið líf og fjör í stúkunni og kepptust menn um að hrópa nafn sinnar félagsmiðstöðvar. Öll fengu lögin góðar viðtökur hjá áhorfendum og var gaman að sjá hversu margir voru duglegir að fagna keppendum hinna félagsmiðstöðvanna.

Strákarnir okkar í Beisinu voru síðastir á svið. Þeir nutu góðs af því að salurinn var orðinn heitur og mikil stemmning í áhorfendum. Þeir náðu strax salnum með sér með miklu klappi og fagnaðalátum, enda var flutningurinn hjá þeim öruggur og líflegur. Þegar þeir svo rifu sig úr bolunum um mitt lagið ætlaði þakið að rifna af húsinu, svo mikil voru fagnaðarlætin.

Það fór svo að Beisið átti eitt af þeim fimm atriðum sem komast í aðalkeppnina í mars. Þrjú bestu atriðin fara áfram og þar að auki eru veittar viðurkenningar fyrir athyglisverðasta flutninginn, sem Beisið fékk, og bestu framkomuna. Hinar félagsmiðstöðvarnar sem fóru áfram voru Pleizið frá Dalvík, Gryfjan frá Grenivík, sem fékk verðlaun fyrir bestu framkomuna, Hyldýpið frá Eyjafjarðarsveit og Himnaríki frá Akureyri.

Að lokinni keppni sá Alan Haywood, sem jafnframt var einn dómara, um að plötusnúðast og var mikið stuð á dansgólfinu.

Myndir frá Húsavík eru hér

Tengill á frétt frá keppninni á mbl.is

Unglingadeild skólans frumsýndi í gærkvöldi söngleikin Wake me up before you go go! eftir Hallgrím Helgason. Í stuttu máli sagt stóðu þau sig frábærlega, enda var stemningin meðal áhorfenda eftir því, mikið klapp og fagnaðarlæti. Höfum við fengið mikið lof frá áhorfendum sem voru mjög ánægðir með sýninguna.

Í síðustu viku voru föndurdagar og Lúsíuhátíð í skólanum. Þriðjudaginn 11. des var föndurdagur í skólahúsinu á Kópaskeri. Þar var ýmislegt föndrað frá níu um morguninn og fram að hádegi. Fimmtudagurinn 13. des hófst á því að allir nemendur úr báðum deildum komu saman í Lundi og fylgdust með þegar nokkrir nemendur úr skólanum komu fram í Lúsíu búningum og sungu Lúsíulög. Þessi skemmtilegi siður komst á fyrir tilstilli Önnu Englund og hefur hún stjórnað honum með myndarbrag í gegnum árin. Eftir morgun mat hófst síðan föndurdagur hjá Lundarnemendum.

Það var gaman að fá foreldra og ömmur og afa í hemsókn að aðstoða sín börn og annarra börn við föndrið. En myndir segja meira en mörg orð.

Myndir frá Lúsíuhátíð

Myndir frá föndurdegi

Þessa dagana standa yfir strangar leikæfingar hjá nemendum unglingadeildar. Í gær, mánudag, var byrjað að æfa á sviðinu í Skúlagarði en frumsýna á þar þann 19. des. Önnur sýning verður daginn eftir, 20. des.

Að þessu sinni var ákveðið að setja upp söngleik og varð fyrir valinu verkið Wake me up before you go go eftir Hallgrím Helgason. Þetta verk fjallar um unglingsstrák sem fer aftur í tímann, eða til ársins 1984 til að reyna að bjarga sambandi foreldra sinna. Eins og vænta má fer margt á annan veg en ætla hefði mátt.

Sýningin er stútfull af lögum frá níunda áratuginum og tilvalið tækifæri að skella sér í leikhús og rifja upp eða kynnast tísku og stemnining þess tíma.

Verkið var fyrst sett upp af nemendafélagi Versló 2001. Árgangur 1986 í Borgarhólsskóla setti verkið upp þegar þau voru í 10. bekk. Einnig er verið að setja upp verkið á Akureyri og fékk það verkefni styrk frá Menningarráði Eyþings.

Ágóði af sýningunum mun renna í ferðasjóð nemenda og hvetjum við alla íbúa sveitarfélagsins að skella sér á sýninguna. Nánari auglýsinga er að vænta síðar.

Farið var upp í Mývatnssveit og borðaður jólamatur á Hótel Seli. Að því loknu var farið í Dimmuborgir að hitta jólasveinana. Á leið til þeirra var nokkurs konar ratleikur (þraut) sem nemendur leystu með mikilli prýði. Upp úr hrauninu spruttu þeir Stekkjastaur og Pottaskefill og tóku á móti börnunum. Pottaskefill var stríðinn en Stekkjastaur öllu virðulegri og svaraði spurningum greiðlega. Í kveðjuskyni sungu svo börnin fyrir jólasveinana.

Smellið hér til að skoða myndir

Í gærmorgun voru ljósin tendruð á jólatrénu sem að venju er staðsett utan við skólahúsið í Lundi. Svo vel hittist á að allir nemendur skólans voru samankomnir í Lundi þar sem 1. til 6. bekkur var á leið í skólaferðalag upp í Mývatnssveit.

Nemendur söfnuðust saman við tréð að loknum morgunmat og var þá enn vel rökkvað eins og sjá má á myndunum. Sungið var jólalag og að því loknu voru ljósin tendruð.

Smellið á myndirnar til að sjá stærri útgáfu.

Framhaldsskólinn á Húsavík stóð í dag fyrir spurningakeppni fyrir grunnskólana í Þingeyjarsýslum. Þetta var liður í undirbúningi liðs þeirra fyrir Gettu betur keppnina og var undirbúnigur að mestu í höndum keppnisliðs FSH. Til keppni mættu 6 lið frá fimm skólum; tvö frá Borgarhólsskóla, úr Mývatnssveit, frá Raufarhöfn og Þórshöfn og úr Öxarfjarðarskóla.

Hver einasti nemandi unglingadeildar Öxarfjarðarskóla fór með að styðja okkar lið, ásamt fjölmörgum kennurum og foreldrum.

Keppendur fyrir hönd Öxarfjarðarskóla voru Jóhanna Margrét úr 9. bekk og Aðalbjörn og Einar úr 10. bekk.