Fréttir

Þá er komið að því eina ferðina enn. Fréttakorn fjögur hefur fæðst, þó manni finnist það síðasta hafa farið út í gær. Smellið á lesa meira til að sjá pistilinn.

Þegar við hófum að bjóða upp á lengda viðveru í skólanum ákváðum við að bjóða nemendum unglingadeildar upp á björgunarsveitarval undir leiðsögn Kidda og Steina. Þátttakan kom á óvart, eða 17 af 21 nemanda völdu að taka þátt.

Markmið verkefnisins er að kynna fyrir unglingunum hversu fjölbreytta og skemmtilega möguleika íslensk náttúra hefur til ferðamennsku og útivistar, hvort heldur sem að sumri eða vetri. Þessum aldurshópi hættir til að festast í inniveru í tómstundum sínum frekar en að vera úti og njóta náttúrunnar. Hér í dreifbýlinu er aðgengi þessa aldurshóps að tómstundamöguleikum er takmarkað en við erum það heppin að á svæðinu er stórbrotin og mikilfengleg náttúra sem allir geta notið. Samhliða þessu munu þau kynnast starfsemi og tilgangi björgunarsveita og þeim hættum og skyldum sem ferðalögum í íslenskri nátturu fylgja.

Við hittumst vikulega á miðvikudögum þar sem til skiptis er innikennsla og æfingar inni, og hins vegar er farið út þar sem látið er reyna á það sem hefur verið kennt. Stefnt er á þrjár æfingaferðir (helgarferðir) á tímabilinu. Eina fyrir áramót og tvær eftir áramót. Einnig er stefnt á að fara í styttri ferðir til að æfa klifur í klifurveggjum og komast í báta. Svo verða einhverjar dagsferðir eftir veðri og aðstæðum.

Krakkarnir eru mjög áhugasamir og spenntir í starfinu og er vonandi að þau eigi eftir að nota og njóta þeirrar þekkingar og reynslu sem þau fá í starfinu.

Myndir úr starfinu þar sem krakkarnir æfa m.a. hnúta, prófa sigtól í brattri brekku og loks síga fram af skólahúsinu er hægt að skoða hér.

í morgun fengum við skemmtilega heimsókn. Það voru rapparinn Poetrix (Sævar Daniel Kolandavelu) og plötusnúðurinn og beat boxarinn Siggi Bahama (líka þekktur undir nafninu DJ Nennisiggi). Þeir tóku nokkur lög og var mjög gaman að fá svona tónlistaratriði inn í skólastarfið.

Poetrix og Bubbi Morthens gerðu lag í sameiningu sem var töluvert vinsælt og mikið spilað í útvarpi í fyrra. Það lag heitir Vegurinn til glötunar.

Eftir að þeir félagar höfðu spilað fyrir alla nemendur og starfsfólk nokkur lög fóru yngri bekkirnir aftur til sinna starfa en Sævar rabbaði við nemendur úr unglingadeild. Hann ræddi meðal annars um ímyndir og fyrirmyndir og hvernig fjölmiðlaumræða gefur oft villandi mynd af þekktu fólki. Hann talaði líka um vald krakkanna yfir sínu lífi og hvaða leiðir standa þeim opnar. Sævar og Siggi hafa verið á yfirreið og heimsótt skóla landsins í haust.

Þetta er verkefni sem Sævar stendur sjálfur að og réðist hann í það því honum ofbauð sú neikvæða umræða og þau misvísandi skilaboð sem fjölmiðlar og tónlistarheimurinn senda ungu fólki. Sævar vill reyna að koma fram sem jákvæð fyrirmynd og vara krakkana við þeim þrýstingi sem þau verða fyrir frá umhverfinu. Hann hefur sjálfur reynt hvað það er að missa fótanna en hefur risið upp og vill miðla af reynslu sinni.

Það var gaman að fá þá félaga í heimsókn og áhugavert hvernig Sævar nálgaðist krakkana á einlægan og skemmtilegan hátt án þess að setja sig í predikunargír eða fylla þau af lífsreynslusögum.
Smellið hér til að sjá myndir.

My space síða Poetrix

Nemendur eru jákvæðir í garð heildstæðs skóla og alla jafna ánægðir með það sem í boði er. Í þessari viku eiga nemendur að velja fyrir nóvembermánuð og bætast inn nýjar tómstundir og námskeið þó eitthvað haldi sér áfram, t.a.m björgunarsveitarnámskeið, fimleikar, fótbolti og opin handmenntastofa. Við komum til með að bjóða upp á námskeið í eldamennsku þar sem áherslan verður m.a. lögð á hvernig hægt sé að nýta afgangana úr ísskápnum – ekki sem verst að kunna að bjarga sér og nýta allan mat!

Fyrirtækið 66°Norður efndi á haustdögum til myndbandasamkeppni meðal grunnskólanema. Hugmyndin að keppninni kom frá Sigurjóni Sighvatssyni, kvikmyndagerðarmanni og eiganda fyrirtækisins. Keppt var í tveimur flokkum, 1.-7. bekk og 8. -10 bekk. Í dómnefnd eru Þorgerður Katrín Gunnarsdóttir, menntamálaráðherra, Baltasar Kormákur Samper, leikstjóri, Þórir Sigurjónsson, kvikmyndargerðarmaður og Helga Viðarsdóttir, markaðsstjóri 66°Norður. Einnig fer fram kosning á netinu og verður niðurstaða hennar tekinn inn í mat dómnefndar.

Verðlaun eru ekki af verri endanum. Skóli sigurvegara fær myndbandsupptökuvél, auk þess sem vinningshafarnir fá fatnað frá 66°Norður að andvirði 150.000 kr í verðlaun.

Fjórar stúlkur úr skólanum sendu myndband inn í keppnina. Það voru þær Freydís Rósa, Margrét Sylvía, María Dís og Sylvía Dröfn. Myndbandið þeirra er mjög gott og ætlum við því að sjálfsögðu sigur. Við hvetjum alla til að fara inn á vef 66°Norður og skoða myndband stelpnanna og gefa því atkvæði. Það er númer 9 í röðinni hjá eldri flokknum.

Smellið hér til að fara beint inn á myndband stelpnanna.

Í morgun spiluðu Guitar Islancio á frábærum tónleikum, fyrir nemendur og starfsfólk Öxarfjarðarskóla og Kópaskersskóla.  Koma þeirra hingað er liður í verkefninu Tónlist fyrír alla. Tónlist fyrir alla er samstarfsverkefni á vegum ríkis og sveitarfélaga sem hefur staðið yfir í meira en 15 ár. Tilgangur verkefnisins er að kynna íslenskum grunnskólabörnum ólíkar tegundir tónlistar sem þau njóta í flutningi frábærra íslenskra tónlistarmanna.

Tónleikarnir stóðu yfir í um 45 mínútur og voru tónlistarmennirnir líflegir og skemmtilegir og héldu áhorfendum við efnið allan tímann. Þeir fluttu að mestu íslensk þjóðlög í eigin útsetningu auk laga eftir Gunnar Þórðarson. Það var mjög gaman þegar þeir fengu áhorfendur til að syngja með í nokkrum lögum. Dagskráin var mjög skemmtileg hjá þeim og var ekki annað að heyra en almenn ánægja hafi verið með tónleikana, bæði hjá ungum sem öldnum. Að minnsta kosti hrósaði hljómsveitin áheyrendum nokkrum sinnum og sögðu að þau væru greinilega tónleikavön.

Guitar Islancio skipa þeir Gunnar Þórðarson gítarleikari, Björn Thoroddsen gítarleikari og Jón Rafnsson sem spilaði á kontrabassa. Þetta eru tónlistarmenn í fremstu röð og hvetjum við alla sem eiga þess kost að fara og sjá þá spila í kvöld á Raufarhöfn.

Myndir frá tónleikunum eru hér.

Okkur langar að minna á foreldrafræðsluna á vegum Fjölskylduþjónustu Norðurþings annað kvöld í Lundi kl. 20-22.
Fræðsluerindi verða tvö á hverju stigi og gert ráð fyrir að hvert taki 60 mín og fundirnir standa því rúmlega tvo klukkutíma í þremur stofum.

Dagskráin er sem hér segir:

Yngsta stig:
Vinnuvist barna - hvað geta foreldrar gert?- Erla Alfreðsdóttir iðjuþjálfi

Samskipti heimila og skóla - Þórhildur Sigurðardóttir sérkennsluráðgjafi

Athugið að foreldrar leikskólabarna eru velkomnir á þennan fund!

Miðstig:
Um samskipti - einelti - Þórhildur Sigurðardóttir sérkennsluráðgjafi

Tölvu-og netnotkun barna- Þorgrímur Sigmundsson ráðgjafi

Unglingastig:
Áhrif umhverfisins og neysla - Arnfríður Kjartansdóttir sálfræðingur

Réttindi og skyldur - Ágúst Óskarsson ráðgjafi

Vonandi sjá sem flestir sér fært að mæta!


Starfsdagur kennara verður næstkomandi mánudag 20. október og verður enginn skóli þann dag.

Í næstu viku verða foreldrasamtöl og munu umsjónarkennarar senda upplýsingar heim með nemendum varðandi þau.

Bestu kveðjur frá Öxarfjarðarskóla,

f.h. starfsfólks,
Hrund

Í dag 10. október er alþjóðlegi geðheilbrigðisdagurinn. Að þessu sinni er megináherslan á geðheilbrigði barna og unglinga.
Samfés er einn af samstarfsaðilum sem koma að deginum og voru umræður um þau mál á landsmótinu um síðustu helgi.

Bendi á tvær síður varðandi daginn.
Heimasíða geðheilbrigðisdagsins, www.10okt.com og
fræðsluvefur um geðheilsu barna; www.umhuga.is

Um síðustu helgi var haldið Landsmót á vegum Samfés fyrir unglingaráðin í félagsmiðstöðvum landsins. Við fórum þrír umsjónarmenn með 16 krakka úr félagsmiðstöðvunum þremur sem reknar eru af sveitafélaginu. Ferðin heppnaðist mjög vel og voru krakkarnir sjálfum sér og sveitarfélaginu til mikils sóma. Það er ekki erfitt að vera umsjónarmaður með svona þægilegum hópi.