Fréttir

Á fimmtudaginn í síðustu viku mætti Rannveig Snót, frá Fjöllum í Kelduhverfi, með góðar gjafir til skólans. Það voru fjórar notaðar tölvur með skjám og öllum fylgihlutum.

Heilbrigðisstofnun var að skipta út vélum hjá sér og bauð þær notuðu á góðu verði. Rannveig og Óli ákváðu að nota tækifærið og skipta sinni gömlu út. Þeim datt í hug að skólanum gætu nýst svona vélar, en um er að ræða pakka frá Hewlett-Packard sem samanstendur af tölvu, 17" flatskjá, bleksprautuprentara, lylkaborði og mús.

Rannveig fór á stúfana og fékk fyrirtæki á svæðinu til að leggja saman í þrjá pakka handa skólanum og svo gáfu hún og Óli gömlu vélina sína með, ásamt öllu sem henni fylgdi.

Þau fyrirtæki sem gáfu vélarnar voru:
Fjallalamb, Kópaskeri
Sparisjóður Þórshafnar og nágrennis, Kópaskeri
Silfurstjarnan, Öxarfirði
Verkalýðsfélag Húsavíkur og nágrennis, Húsavík

Það er alltaf gaman að fá góðar gjafir og gott að finna hlýhug samsveitunga í garð skólans. Þessar tölvur munu koma að góðu gagni við kennslu og störf nemenda.

Við þökkum kærlega fyrir okkur.

Fjölbrautarskólinn á Húsavík bauð nemendum grunnskólanna í Þingeyjarsýslum til stærðfræðikeppni. Undankeppni fór fram fyrir páska í grunnskólunum og tóku 29 nemendur úr 5 skólum þátt í henni. Sl. laugardag kepptu 10 efstu úr undankeppninni til úrslita í FSH. Við áttum þarna tvo fulltrúa, þau Aðalbjörn og Ke. Aðalbjörn náði þeim frábæra árangri að verða í 3. sæti. Við erum ákaflega stolt af honum og óskum honum til hamingju með árangurinn.

Á sumardaginn fyrsta hefur sú hefð skapast að vera með samsýningu á handverki eldri borgara af svæðinu og nemenda við skólann á Kópaskeri. Erla Kristinsdóttir á heiðurinn af þessu framtaki og hefur sýningin alltaf verið hin veglegasta.

Síðast liðinn fimmtudag var sýning á verkunum og var margt glæsilegra hluta að sjá. Komu fjölmargir að líta á afrakstur vetrarins og þáðu kaffi og meðlæti sem var í boði foreldrafélags Öxarfjarðarskóla, verslunarinnar Bakka og Íslensk-Ameríska.

Myndir af munum eru hér og vonandi bætast bráðlega við fleiri myndir af verkum eldri borgaranna og frá sýningunni sjálfri.

Nemendur skólans voru í stóru hlutverki í gær þegar Gljúfrastofa var formlega opnuð. Yngri nemendur skólans sungu frumsamið lag Guðrúnar S. K. um tröllaskoðun í þjóðgarðinum og sögðu frá tröllasögum sínum og tröllunum sem þau gerðu úr steinum. Einar, Aðalbjörn, Baldur, Friðbjörn, Kristveig og Íris úr unglingadeild fóru með ýmsa texta um þjóðgarðinn og sögðu frá þjóðgarðsskólaverkefninu. Síðan klipptu Hlynur Aðalsteins, Lillý Óla og Bjarni Þór, ásamt umhverfisráðherra, á borðann inn í "hlöðuna" þar sem sýningin er.

Myndir frá opnuninni eru hér.

Í ár tók skólinn að venju þátt í verkefninu Börn hjálpa bórnum. Nemendur miðdeildar gengu í hús núna í mars og söfnuðu framlögum fyrir ABC Barnahjálp. Afraksturinn, 25.354 kr. fóru inn á reikning ABC. Þessir peningar eiga eftir að koma sér vel fyrir munaðarlaus og þurfandi börn í Pakistan, Kenya og Úganda. 

Árshátíð Öxarfjarðarskóla verður haldin í Skúlagarði fimmtudaginn 22. mars, kl. 19:00.
Fjölbreytt dagskrá er í boði og er hún í höndum 1. - 7. bekkjar
Veitingar verða seldar í hléi á sanngjörnu verði.

Allir velkomnir

Miðaverð
Fullorðnir: 1500 kr.
Börn 6-16 ára: 500 kr.

Hin árlega vorhátíð nemenda unglingadeildar var haldin í gær. Venjulega hefur hún verið á Hörpunni og því heitið Hörpugleði. Núna var ákveðið að hafa hana fyrr á dagskrá og var hátíðin því kölluð Góugleði að þessu sinni.

Miðvikudaginn 7. febrúar buðu nemendur miðdeildar í Lundi félögum sínum frá Kópaskeri í heimsókn til sín. Þar var margt gert sér til skemmtunar, m.a. boðið upp á dýrindis súkkulaðikökur með kaffinu, farið út í þrautakeppni, haldin X-Factor keppni þar sem margir magnaðir söngfuglar tróðu upp, borðaðar pítsur og farið í leiki og dansað. Allir skemmtu sér vel langt fram á kvöld og er óhætt að segja að dagurinn hafi lukkast vel.

Myndir frá deginum eru komnar inn hér.