Fréttir

Öskudagur var starfsdagur í grunnskólanum og voru nemendur því í fríi þann dag. Báðar leikskóladeildirnar voru hins vegar opnar og mættu börnin í grrímubúningum. Á Kópaskeri gengu leikskólakonur með börnin lítinn hring um þorpið í hríðarkófi og sungu í nokkrum fyrirtækjum og fengu góðgæti í staðinn. Leikskólabörnin í Lundi mættu á fund starfsfólks og sungu og gaukaði Hulda ráðskona að þeim góðgæti að launum. Dagurinn var börnunum skemmtilegur og þau nutu sín vel.

Grunnskólanemendur hittust við búðina á Kópaskeri og gengu milli fyrirtækja en Ásta Helga Viðar leiddi gönguna ásamt fleiri foreldrum og Björn Leifsson þandi nikkuna að venju.

Hér má skoða myndir frá leikskólabörnum en vefstjóra hafa ekki borist myndir frá grunnskólanemum, ef einhver lumar á myndum þá væru þær vel þegnar.

Kæru foreldrar og forráðamenn.

Nú standa fyrir dyrum foreldraviðtöl. Dagana 15., 16. Og 17. mars er ráðgert að hafa foreldraviðtöl. Nánari upplýsingar um tíma og dag koma frá umsjónarkennara viðkomandi barns.

Báðar leikskóladeildirnar, í Lundi og á Kópaskeri, verða opnar í sumar. Sumarlokun verður, hjá báðum deildum, frá og með 11. Júlí til 15. ágúst. Starfsfólk við leikskóladeild Lundar í sumar verða þær Silja Rún, Lára Björk og Ágústa. Starfsfólk á Kópaskeri verða þær Aðalbjörg og Ásta.

Í lok þessarar viku fá nemendur nýtt valblað með sér heim. Árshátíð Öxarfjarðarskóla nálgast nú óðfluga. Ákveðið hefur verið að nota lengda viðveru að miklu leyti í leikæfingar og undirbúning og litast valblað næsta tímabils af þeirri ákvörðun.

Kær kveðja,
Guðrún S. K.

Á morgun, öskudag, verður starfsdagur í grunnskólanum. Leikskóladeildirnar verða báðar opnar á venjulegum tíma. Foreldrafélagið mun hafa umsjón með dagskrá á Kópaskeri. Það verður gengið um og sungið í fyrirtækjum og á eftir verður safnast saman í Pakkhúsinu.

Það á að hittast við búðina kl. 13 og verður lagt af stað þaðan.

Í dag og í gær fór meirihluti unglingadeildar í göngferðir upp á fjöll í nágrenni skólans í fylgd fjögurra starfsmanna.

Veðrið lék við hópinn báða dagana og gerði þetta að ógleymanlegri upplifun.

Krakkarnir stóðu sig allir ótrúlega vel í þessum ferðum og einstaklega ánægjulegt að sjá hvað þau höfðu gaman af þessu. Þau geta verið stolt af sér yfir góðum árangri og persónulegum sigrum.

Smellið á lesa meira til að sjá ferðasöguna.

Myndir frá Þverárhyrnu

Myndir frá Sandfelli

Í síðustu viku, þann 8. febrúar blótuðu nemendur leikskóladeildar á Kópaskeri Þorra. Krökkunum fannst þetta mjög spennandi og voru dugleg að prófa. Sumum þótti til dæmis hákarlinn algjört sælgæti.

Skoða myndir

Í dag komu góðir gestir færandi hendi til okkar í skólann. Það voru þau Guðrún Erla Jónsdóttir, framkvæmdastjóri Orkuveitu Húsavíkur, og Bergur Elías sveitarstjóri. Þau afhentu öllum nemendum endurskinsmerki frá orkuveitunni og um leið afhenti Guðrún Erla nöfnu sinni Guðrúnu skólastjóra 100.000 kr peningagjöf frá orkuveitunni.

Þetta var höfðingleg gjöf sem við erum afar þakklát fyrir. Peningunum verður ráðstafað í kaup á búnaði sem mun koma nemendum til góða.

Smellið hér til að skoða myndir

Á morgun, fimmtudaginn 16. desember verða litlu jólin haldin í skólanum. Þetta verður um leið aðaljólaballið hér á svæðinu okkar þetta árið fyrir öll börn skólasvæðisins einnig þau sem eru ekki í leik- eða grunnskólanum. Öðrum áhugasömum er velkomið að mæta, hvort sem eru foreldrar, afar og ömmur, systkini og hverjum öðrum sem vilja gleðjast með börnunum og dansa í kringum jólatré. Heyrst hefur að við getum jafnvel átt von á sveinum ofan af fjöllum.

Kaffi og smákökur verða í boði.

Skemmtunin hefst um kl 14:30 og stendur til kl 16.

Í dag var tekið smá forskot á jólastemninguna hér í skólanum. Sú skemmtilega hefð hefur skapast hér síðustu árin að halda upp á Lúsíudaginn að sænskum sið. Það var með Önnu Englund og hennar börnum sem þessi venja komst á hér. Það var hún Lotta Englund sem hafði veg og vanda að Lúsíuhátíðinni þetta árið ásamt áhugasömum nemendum, en Bryndís Edda var sjálf Lúsía.

Eftir morgunmat komu allir saman í gryfju og sungu 5-6 jólalög undir harmoníkuundirleik Björns Leifssonar en á meðan undirbjó Lotta Lúsíuhópinn. Hópurinn kom svo fram og söng hefðbundin Lúsíulög og útdeildu saffranbrauðum.

Eftir hádegi var svo föndurstund hjá okkur. Það voru nokkrar föndurstöðvar sem nemendur gátu farið á milli, jólakortagerð, kransagerð, ullarþæfing og kertagerð. Foreldrar og aðrir ættingjar voru velkomnir eins og áður og voru nokkrir sem nýttu sér að koma og eiga föndurstund með börnunum.

Myndir frá deginum

Upplýsingar um Lúsíuhátíðina af jólavefnum

Smá fróðleikur og textar á sænsku, norsku og dönsku af vef Norræna félagsins