Fréttir

Í gær fengum við skákmeistara, Birki Karl Sigurðsson, í heimsókn sem hélt námskeið fyrir alla nemendur skólans auk þess sem nemendur úr Grunnskóla Raufarhafnar komu einnig og tóku þátt.

Ómar Gunnarsson frá björgunarsveitinni Núpum heimsótti Vinakot í dag með fræðslu um starf björgunarsveitarinnar.

Í gærmorgun var tendrað á jólatrénu við skólann eins og venja er í upphafi aðventu og safnast þá bæði leik-og grunnskólanemendur þar saman. Þó fimbulkuldi biti í kinnar, létum við ekki deigan síga og sungum og dönsuðum í kringum tréð.

Þá er vel heppnaðri árshátíð skólans lokið þetta árið. Allir nemendur skólans auk elstu barna leikskólans stigu á svið, sungu og léku.

Í morgun fögnuðum við degi íslenskrar tungu (16.nóvember) og jafnframt 217 ára afmæli Jónasar Hallgrímssonar sem lagði sitt af mörkum til nýyrðasmíði á íslensku.

Þessa dagana litast skólastarfið af undirbúningi árshátíðar. Í mörg horn er að líta og ýmislegt sem þarf að undirbúa, s.s. búningar, sviðsmynd, leikmunir, söngur o.fl. Nemendur hafa undirbúið stiklu í aðdraganda árshátíðarinnar og alveg ljóst að enginn má láta þennan viðburð framhjá sér fara. Takið 22. nóvember frá!

Starfsáætlun skólaársins 2024-2025 hefur nú verið kynnt bæði í skólaráði Öxarfjarðarskóla og fjölskylduráði.

Í fyrradag fékk unglingadeildin skemmtilega heimsókn - farandverkefni á vegum Listfræðsluverkefni Skaftfells - sem kennt var af Solveigu Thoroddsen. Verkefnið miðast að því að gefa þátttakendum tækifæri til að vinna með innsetningarlist sem form þar sem notast er við mismunandi miðla eins og ljósmyndun og skúlptúrgerð til að búa til innsetningu í rými.

Þann 27.september sl. var haldið árlegt grunnskólamót á Laugum og fóru nemendur 7.-10.b ásamt nemendum frá Grunnskóla Raufarhafnar saman ásamt kennurum sínum.

Okkur barst skemmtileg gjöf í leikskólann frá Unni í Klifshaga. Hún prjónaði nokkur vettlingapör sem eru þá til aukalega og geta nýst ef vettlingar barnanna eru blautir eða gleymast heima. Gjöfin er til minningar um þær Huldu Þórarinsdóttur og Laufeyju Bjarkadóttur í Hafrafellstungu. Við þökkum fyrir hlýhug og velvild í garð skólans og greinilegt að bakhjarlar okkar leynast víða.